Janubiy Afrikaning Durban shahridagi Afrika sog‘liqni saqlash tadqiqot instituti mutaxassislari koronavirusga qarshi Pfizer vaksinasining ikki dozasini olgan 12 nafar ko‘ngillida qon tahlili o‘tkazdi. Natijada yangi “omikron”shtammi koronavirusning asl nusxasiga qaraganda emlanganlardagi antitanalar darajasini 41 baravar kamaytirgani aniqlandi.
Ma’lum bo‘lishicha, Pfizer vaksinasi yangi shtammga qarshi bor-yo‘g‘i 22,5 foiz samara ko‘rsatgan, ammo preparat “omikron” bilan kasallangan bemorlarni kasallikning og‘ir kechishidan hanuz himoyalay oladi. Tadqiqot natijalari hali ilmiy jurnalda nashr etilmagan va ko‘rib chiqilmagan.
Laboratoriya rahbari Aleks Segal boshchiligidagi JAR olimlari “omikron” “vaksinaning infeksiyadan himoya qilish qobiliyatini sezilarli darajada pasaytirishini” birinchi bo‘lib tasdiqladi. Biroq ular buster doza immunitetni oshirishi mumkinligiga ishonadi.
Koronavirusning yangi “omikron” shtammi birinchi marta 11-noyabr kuni Janubiy Afrikada topilgan. Britaniyalik olimlarning ta’kidlashicha, yangi shtamm tarqalish tezligi tufayli avvalgilariga, jumladan, deltaga qaraganda xavfliroq bo‘lishi mumkin. Jahon sog‘liqni saqlash tashkiloti mavjud vaksinalar ushbu shtammga qarshi samarasiz bo‘lishi mumkin, degan shubhalar tufayli “omikron”ni xavfli deb tan oldi. Tashkilot, shuningdek, ilgari koronavirusni boshdan o‘tkazganlarda “omikron” bilan qayta kasallanish ehtimoli yuqoriligini ma’lum qildi.
Avvalroq Britaniya bosh vaziri Boris Jonson mamlakatda “omikron” shtammi bilan kasallangan bemor vafot etganini aytgandi. Bungacha dunyoda “omikron” shtammidan birorta o‘lim holati ma’lum emasdi.
JSST ma’lumotlariga ko‘ra, “omikron” dunyoning 60 dan ortiq mamlakatlarida qayd etilgan.
Izoh (0)