Rossiya prezidenti Vladimir Putin va Buyuk Britaniya bosh vaziri Boris Jonson o‘zaro telefon orqali muloqot qildi. Bu haqda Kreml matbuot xizmatiga tayanib, Meduza xabar berdi.
Ma’lum qilinishicha, Putin “Kiyevning destruktiv chizig‘i” bo‘yicha misollar keltirgan, shuningdek, u Ukraina hukumati Donetsk xalq respublikasi (DXR) va Lugansk xalq respublikasi (LXR) chegaralaridagi vaziyatni ataylab murakkablashtirayotgani hamda rus tilida so‘zlashuvchilarni diskriminatsiya qilish bo‘yicha siyosat yuritayotganini ta’kidlagan.
Jonsonning matbuot xizmati esa o‘z navbatida, suhbat davomida Britaniya bosh vaziri Rossiya qo‘shinlarining Ukraina chegarasiga to‘planayotganidan xavotirda ekanini bildirganini va “har qanday beqarorlashtiruvchi harakat jiddiy oqibatlarga olib kelishi mumkin bo‘lgan strategik xatoga aylanishi”dan ogohlantirgani haqida yozgan.
G‘arbda so‘nggi bir necha haftadan buyon Ukraina chegarasida Rossiya qo‘shinlari to‘planayotgani to‘g‘risidagi gapirilmoqda. Rossiya mamlakat hududi bo‘ylab qo‘shinlarning ko‘chirilishi — mutlaqo o‘zining ichki ishi ekanini qayd etyapti.
Ukraina atrofida vaziyat Putin va AQSh prezidenti Jo Bayden o‘rtasida 7-dekabr kuni o‘tkazilgan videoaloqa suhbatining asosiy mavzusi bo‘lgandi. G7 davlatlari 12-dekabr kuni Rossiyaning Ukrainaga hujumi “qimmatga tushishi” va o‘z ortidan “ulkan oqibatlarni” yuzaga keltirishi mumkinligi to‘g‘risida qo‘shma bayonot bergan.
Izoh (0)