Жанубий Африканинг Дурбан шаҳридаги Африка соғлиқни сақлаш тадқиқот институти мутахассислари коронавирусга қарши Pfizer вакцинасининг икки дозасини олган 12 нафар кўнгиллида қон таҳлили ўтказди. Натижада янги «омикрон»штамми коронавируснинг асл нусхасига қараганда эмланганлардаги антитаналар даражасини 41 баравар камайтиргани аниқланди.
Маълум бўлишича, Pfizer вакцинаси янги штаммга қарши бор-йўғи 22,5 фоиз самара кўрсатган, аммо препарат «омикрон» билан касалланган беморларни касалликнинг оғир кечишидан ҳануз ҳимоялай олади. Тадқиқот натижалари ҳали илмий журналда нашр этилмаган ва кўриб чиқилмаган.
Лаборатория раҳбари Алекс Сегал бошчилигидаги ЖАР олимлари «омикрон» «вакцинанинг инфекциядан ҳимоя қилиш қобилиятини сезиларли даражада пасайтиришини» биринчи бўлиб тасдиқлади. Бироқ улар бустер доза иммунитетни ошириши мумкинлигига ишонади.
Коронавируснинг янги «омикрон» штамми биринчи марта 11 ноябрь куни Жанубий Африкада топилган. Британиялик олимларнинг таъкидлашича, янги штамм тарқалиш тезлиги туфайли аввалгиларига, жумладан, дельтага қараганда хавфлироқ бўлиши мумкин. Жаҳон соғлиқни сақлаш ташкилоти мавжуд вакциналар ушбу штаммга қарши самарасиз бўлиши мумкин, деган шубҳалар туфайли «омикрон»ни хавфли деб тан олди. Ташкилот, шунингдек, илгари коронавирусни бошдан ўтказганларда «омикрон» билан қайта касалланиш эҳтимоли юқорилигини маълум қилди.
Аввалроқ Британия бош вазири Борис Жонсон мамлакатда «омикрон» штамми билан касалланган бемор вафот этганини айтганди. Бунгача дунёда «омикрон» штаммидан бирорта ўлим ҳолати маълум эмасди.
ЖССТ маълумотларига кўра, «омикрон» дунёнинг 60 дан ортиқ мамлакатларида қайд этилган.
Изоҳ (0)