Buyuk Britaniyada koronavirusning “omikron” shtammi bilan kasallangan bemorlardan kamida bir nafari vafot etgan. Bu haqda mamlakat bosh vaziri Boris Jonson ma’lum qildi.

“Afsuski, omikron kasalxonaga yotqizishlarni kuchaytirmoqda va afsuski, kamida bitta bemorning “omikron”dan vafot etgani tasdiqlandi” — dedi u. Jonson marhum haqida hech qanday ma’lumot bermadi.

Bungacha dunyoda “omikron” shtammidan birorta o‘lim holati ma’lum emasdi.

Avvalroq Boris Jonson koronavirusning yangi “omikron” shtammi sabab voyaga yetgan barchaga Yangi yilga qadar revaksinatsiyadan o‘tishga ruxsat bergandi. Bundan oldin hukumat vaksinaning buster dozasini odamlar yanvar oxiriga olishi mumkinligini rejalashtirayotgandi.

Shuningdek, Jonson Angliyada “B rejani” joriy etgandi — u odamlar uydan turib ishlashini, jamoat joylarida niqob taqish majburiyatini va vaksina hujjatlaridan foydalanishni o‘z ichiga oladi. Shotlandiya, Uels va Shimoliy Irlandiya o‘z cheklovlarini joriy etgan. Buyuk Britaniyada hozirda 3 mingdan ortiq odamda “omikron” shtammi tasdiqlangan.

Koronavirusning yangi “omikron” shtammi birinchi marta 11-noyabr kuni Janubiy Afrikada topilgan. Britaniyalik olimlarning ta’kidlashicha, yangi shtamm tarqalish tezligi tufayli avvalgilariga, jumladan, deltaga qaraganda xavfliroq bo‘lishi mumkin. Jahon sog‘liqni saqlash tashkiloti mavjud vaksinalar ushbu shtammga qarshi samarasiz bo‘lishi mumkin, degan shubhalar tufayli “omikron”ni xavfli deb tan oldi. Tashkilot, shuningdek, ilgari koronavirusni boshdan o‘tkazganlarda “omikron” bilan qayta kasallanish ehtimoli yuqoriligini ma’lum qildi.

JSST ma’lumotlariga ko‘ra, “omikron” dunyoning 60 dan ortiq mamlakatlarida qayd etilgan.