Butun dunyo yoshlari global iqlim o‘zgarishlari sabab insoniyatning kelajagini pessimistik baholab, hukumatlar ushbu muammoni hal etish uchun yetarlicha chora ko‘rmayapti deb hisoblamoqda. Bu haqda The Lancet Planetary Health ilmiy jurnalida e’lon qilingan tadqiqot natijalarida so‘z boradi, deb xabar beradi “Interfaks”.
So‘rovda Avstraliya, Braziliya, Buyuk Britaniya, Hindiston, Nigeriya, Portugaliya, AQSh, Filippin, Finlyandiya va Fransiyadan bo‘lgan 16-25 yosh oralig‘idagi 10 ming respondent ishtirok etgan. Tadqiqot o‘z ichiga Stenford universiteti mutaxassislarini olgan xalqaro olimlar jamoasi tomonidan may—iyun oylari o‘tkazilgan.
Respondentlarning qariyb 60 foizi iqlim o‘zgarishidan “juda” yoki” “favqulodda” xavotirda ekanini ko‘rsatgan, 45 foizi esa ushbu masala bo‘yicha his-tuyg‘ulari kundalik hayotlariga ta’sir qilayotganini bildirgan. So‘rov ishtirokchilarining salkam uchdan ikki qismi o‘z hukumatlari iqlim falokatlarini bartaraf etish bo‘yicha yetarlicha chora ko‘rmayapti degan bo‘lsa, 58 foiz respondent hukumatlar “menga va/yoki kelajak avlodga xiyonat qilyapti”, deya hisoblagan.
So‘rov ishtirokchilarining to‘rtdan uch qismi kelajakdan xavotirda ekanliklarini tan olgan, 56 foizi esa “insoniyatning halokati muqarrar” deb hisoblagan.
“Farzandlarimizning xavotirlari, o‘z hukumatlari tomonidan ko‘rilayotgan iqlim o‘zgarishiga adekvat javob bermayotganini hisobga olsak, mutlaqo oqilona javobdir”, — deydi tadqiqot mualliflaridan biri, Bat universiteti vakili Kerolayn Xikman.
Avvalroq JSST 15 yil ichida birinchi marta havo sifati bo‘yicha tavsiyalarini kuchaytirgani to‘g‘risida xabar berilgandi. Havo ifloslanishidan yiliga 7 million kishi vafot etadi — bu chekish oqibatidagi o‘lim darajasiga yaqindir. Kanada va Britaniya olimlari guruhi tomonidan o‘tkazilgan tadqiqotlarga ko‘ra esa iqlim o‘zgarishlari sabab Yer 500 yildan so‘ng yashash uchun yaroqsiz holga kelib qoladi.
Izoh (0)