BMW X7, Toyota Prado, Hongqi: O‘zbek shou-biznesi vakillari qanday avtomobillarni boshqaradi? (foto)

Mashina nafaqat uzoqni yaqin qilish, balki atrofdagilarda yaxshi taassurot qoldirish va shaxs imijini yaratishga ham xizmat qiladi. “Daryo” muxbiri Nargiza Murodova ayrim o‘zbek shou-biznesi vakillarining qanday rusumdagi avtomobillarni boshqarishini aniqladi.

Yulduz Usmonova

Yulduz Usmonovaning qora rangdagi BMW X7 avtomobili bor. Uni turmush o‘rtog‘i 2019-yili sovg‘a qilgan. Ammo xonanda kamdan kam hollarda mashinani o‘zi boshqaradi. Uning yo‘ldagi doimiy hamrohi — turmush o‘rtog‘i Mansur Agaliyev va ma’muri bo‘ladi. Bundan tashqari, Mansur Agaliyev shu yilning iyun oyida qora rangdagi Hongqi avtomobilini ham xarid qildi.

Ozoda Nursaidova

Ozoda Nursaidova 3 yildan buyon mashina boshqarmayotganini va BMW X5 avtomobilini ham singlisi Nilufar Nursaidova uchun xarid qilganini ma’lum qildi. Nilufar opasi bilan hamisha birga. Balki, shu bois Ozoda Nursaidova mashina boshqarishga zarurat sezmayotgandir.

Munisa Rizayeva

Munisa Rizayeva ayni kunlarda oq rangdagi BMW X7 va qora Malibu 2 avtomobillarini boshqaradi. U shu kungacha “Jiguli”, Matiz, Nexia, Nissan Qashqai va Mercedes’ning bir necha rusumdagilarini boshqargan. BMW X7 avtomobilini esa 2019-yili xarid qilgan va bu qaroridan hech qachon afsuslanmaydi.

Rayhon

Rayhon G‘aniyeva ham haydovchilik borasida katta tajribaga ega. U ayni kunlarda oq rangdagi Lexus Rx 350 avtomobilini boshqaradi. Uning ilk marta Nexia 2 rusumidagi avtomobilni xarid qilganini ma’lum qildi.

Hosila Rahimova

Hosila Rahimovaga shu hafta Dubaydan buyurtma asosida qora rangdagi Toyota Land Cruiser X4 avtomobilini olib kelindi.“Ilk mashinam ‘Jiguli’ bo‘lgan, uni dadam rahmatli sovg‘a qilgan. Undan keyin Nexia 2 avtomobilini xarid qildim. Uni ancha yil boshqargach, oq rangli Lacetti sotib olganman. Undan keyin qora rangdagi Captiva va Toyota Land Cruiser Prado’ni boshqarganman”, — deydi xonanda Hosila Rahimova.

Ziyoda

Ziyoda ayni kunlarda Xitoyda ishlab chiqarilayotgan qimmatbaho mashinalardan biri Hongqi’ni boshqaradi. U ilk mashinasini prodyusserlik markazida ishlab yurgan kezlari xarid qilgan. Uning Matiz’ida Oybek va Nigora ham doimiy hamrohi bo‘lishgan.

Shahzoda Muhammedova

Aktrisa va dizayner Shahzoda Muhammedova ayni kunlarda gilos rangdagi Tracker avtomobilini boshqaradi. Mazkur mashinani  turmush o‘rtog‘i Marat Xayrullayevich shu yilgi tug‘ilgan kuniga sovg‘a qilgan. Undan avvalgi yil esa Equinox avtomobilini sovg‘a qilgandi.

Uning ilk mashinasi Nexia 2 avtomobili bo‘lgan va u bilan avtohalokatga uchragach, bir muddat mashina boshqarmagan.

Nilufar Usmonova

Nilufar Usmonova qora rangdagi Lexus LX avtomobilini boshqaradi. Ammo uzoq safarlarda mashinani o‘zi emas, balki ma’muri Jamshid Bobojonov haydaydi. U xonanda Umidaxonning turmush o‘rtog‘i bo‘ladi.

Shohjahon Jo‘rayev

Shohjahon Jo‘rayev ayni kunda oq rangdagi Land Cruiser Prado avtomobilini boshqaradi. Xuddi shu rusumdagi avtomobil qiziqchi Avaz Ohun va xonanda Botir Qodirovda ham bor.

Sardor Mamadaliyev

Sardor Mamadaliyev oq rangdagi Toyota Land Cruiser avtomobilini boshqaradi. U shu kungacha qora rangdagi Lacetti  va Captiva mashinalarini ham xarid qilgan.

Parizoda

Raqqosa Parizoda 2018-yildan buyon Malibu avtomobilini boshqaradi. Uning ilk mashinasi Nexia bo‘lgan. Undan so‘ng oq  Lacetti va qora rangdagi Captiva mashinalarini boshqargan. Ayni kunlarda esa yangi mashina xarid qilishni rejalashtirmoqda.

Sitora Farmonova

Aktrisa Sitora Farmonova to‘q kulrang Malibu mashinasini boshqaradi. Undan avval esa Lacetti mashinasidan foydalangan.

Halima Ibragimova

Qiziqchi Halima Ibragimovaning bir emas, naq ikkita mashinasi bor. U Malibu 2  va Tracker avtomobillarini xarid qilgan. Ammo zarurat tug‘ilmasa, deyarli mashina ruliga o‘tirmaydi. Avtomobillarni, asosan, turmush o‘rtog‘i boshqaradi.

Saida Saidbekova

Aktrisa Saida Saidbekovaga turmush o‘rtog‘i Malibu va Trailblazer avtomobillarini sovg‘a qilgan. Aktrisa kayfiyatiga va boradigan manziliga qarab mashinalaridan birini boshqaradi.

Og‘abek Sobirov

Og‘abek Sobirov ham yaqinda Trailblazer rusumidagi avtomobilni xarid qildi. Undan avval ancha yil Captiva mashinasidan foydalangan.

Durdona Qurbonova

Durdona Qurbonovaning ilk mashinasi Nexia 3 bo‘lgan, undan so‘ng qora rangli Lacetti Gentra mashinasini xarid qildi.

Feruza Normatova

Feruza Normatova ham hozircha Gentra mashinasini boshqaradi.

Shahlo Zoirova

Ikki yil avval “Bravo” jamoasi a’zosi Shahlo Zoirovaga hamkasblari oq rangdagi Captiva mashinasini sovg‘a qilishgandi. Ammo ayni kunda u oq rangdagi Malibu avtomobilini boshqaradi.

Asal Shodiyeva

Asal Shodiyeva bir necha yillardan buyon Mercedes-Benz S500 avtomobilini boshqaradi.

Shahzoda Matchonova

Aktrisa Shahzoda Matchonova qora rangdagi Equinox avtomobilini boshqaradi.