Namanganda Damas o‘quvchi qizni urib ketdi, Navoiyda Lada Vesta ag‘anadi. YTH tafsilotlari

O‘zbekistonda so‘nggi kunlarda sodir bo‘lgan YTH tafsilotlarini taqdim etamiz.

Uchquduqda Spark bilan to‘qnashgan Lada ag‘anadi.

2021-yil 6-dekabr kuni soat 09:30 larda Uchquduq tumani “Do‘stlik” mahallasi hududidan o‘tgan Uchquduq shahar ichki avtomobil yo‘lida Spark va Lada avtomobillari to‘qnashgan. Ma’lum bo‘lishicha, Straus trans zar MChJda haydovchi vazifasida ishlovchi fuqaro K.Z. jamiyatga tegishli Spark avtomashinasini boshqarib borayotib chapga burilishni amalga oshirayotgan vaqtida o‘zi bilan bir yo‘nalishda Lada Vesta bilan to‘qnashib yo‘l-transport hodisasi sodir qilgan.

Yo‘l-transport hodisasi oqibatida Lada Vesta avtomashinasi qarama-qarshi yo‘lning qatnov qismiga chiqib ag‘anagan. Oqibatda Lada Vesta avtomashina haydovchi L.R. yo‘lovchi S.D. va Spark avtomashinasi haydovchisi K.Z. tan jarohati olib Uchquduq tumani tibbiyot birlashmasiga murojaat qilgan.

Hozirda to‘plangan hujjatlar bo‘yicha tergovga qadar tekshiruv harakatlari Uchquduq tuman IIB YHXB katta inspektori tomonidan olib borilmoqda.

To‘raqo‘rg‘onda “Zil” 51 yoshli velosipedchini urib ketdi.

2021-yil 4-dekabr kuni soat 12:05 larda “Katta Qurama” MFY ichki yo‘lida yuk mashinasi bilan YTH sodir bo‘lgan. Namangan viloyati IIB xabar berishicha, To‘raqo‘rg‘on tumanida yashovchi fuqaro (1996-yilda tug‘ilgan) MChJga tegishli bo‘lgan “GAZ-53” yuk mashinasini boshqarib borayotib, harakat xavfsizligini ta’minlay olmay, yo‘lni kesib o‘tayotgan velosiped haydovchisini urib yuborgan. Hodisa oqibatida fuqaro voqea joyida vafot etgan. Velosiped egasi 1960-yilda tug‘ilgan, To‘raqo‘rg‘on tumanida yashovchi fuqaro ekani aniqlangan.

Ushbu holat bo‘yicha To‘raqo‘rg‘on tuman IIB huzuridagi TB tomonidan 2021-yil 4-dekabr kuni Jinoyat kodeksining 266-moddasi 2-qismi (odam o‘limiga sababchi bo‘lgan transport xavfsizligi qoidalarini buzish) bilan jinoyat ishi qo‘zg‘atilgan.

Popda Damas 12 yoshli qizning o‘limiga sababchi bo‘ldi.

2021-yil 6-dekabr kuni soat 09:00 larda, G‘urumsaroy–Xonobod–Chodak–Guliston yo‘lining 37-kilometridagi Pop tumani “Guliston” MFY hududida Damas piyodani urib ketgani xabar qilindi. Avtomashinada bo‘lgan fuqaro (Pop tumanida yashovchi, 1985-yilda tug‘ilgan) Damas’ni boshqarib borayotib, harakat xavfsizligini ta’minlay olmay, yo‘lni kesib o‘tayotgan piyodani (2009-yilda tug‘ilgan) urib yuborgan. Ma’lum qilinishicha, qiz ota-onasi qaramog‘ida bo‘lib, tumandagi maktabning 6-sinfida o‘qigan.

O‘quvchi qiz olgan og‘ir tan jarohati oqibatida shifoxonada vafot etgan.

Ushbu holat bo‘yicha Pop tuman IIB huzuridagi TB tomonidan 2021-yil 6-dekabr kuni Jinoyat kodeksining 266-moddasi 2-qismi bilan jinoyat ishi qo‘zg‘atilgan.