O‘zbekiston yo‘llarida sodir bo‘lgan hodisalar tafsilotlarini taqdim etamiz.
Namanganda Spark zovurga tushib ketdi.
2021-yilning 13-dekabr kuni soat 16:20 larda, Namangan viloyati, Norin tumani hududidan o‘tuvchi Cho‘ja–Xaqulobod avtomobil yo‘lining 23-kilometrida haydovchi D.R. (1978-yilda tug‘ilgan) Spark avtomobilida harakatlanayotib, rul boshqaruvini yo‘qotishi oqibatida zovurga tushib ketgan.
Hodisa natijasida haydovchi D.R. tan jarohati bilan shifoxonaga yotqizilgan.
Mazkur YTH yuzasidan Norin tumani IIB YHXB xodimlari tomonidan surishtiruv harakatlari olib borilmoqda.
Qashqadaryoda “Jiguli” avtobus bilan to‘qnashdi.
2021-yilning 11-dekabr kuni soat 17:10 larda, Qashqadaryo viloyati, Nishon tumani hududidan o‘tuvchi 4R-89 avtomobil yo‘lining 31-kilometrida haydovchi T.B. (1988-yilda tug‘ilgan) “VAZ-2103” avtomobilini yuqori tezlikda boshqarayotib, rul boshqaruvini yo‘qotgan va qarama-qarshi yo‘nalishdan harakatlanib kelayotgan, haydovchi U.B. (1996-yilda tug‘ilgan) boshqaruvidagi Isuzu avtobusi bilan to‘qnashgan.
Oqibatda “VAZ-2103” avtomobili haydovchisi T.B. og‘ir tan jarohatlari olib voqea joyida vafot etgan hamda ushbu avtomobil yo‘lovchisi E.A. (2013-yilda tug‘ilgan) va avtobus yo‘lovchisi M.R. (1973-yilda tug‘ilgan) tan jarohati olib shifoxonaga yotqizilgan.
Mazkur YTH yuzasidan Nishon tumani IIB huzuridagi TB tomonidan dastlabki tergov harakatlari olib borilmoqda.
Toshkentda Matiz va Lacetti to‘qnashuvi oqibatida 1 kishi vafot etdi, 4 kishi jarohatlandi.
2021-yilning 11-dekabr kuni soat 17:50 larda, Toshkent shahar, Mirzo Ulug‘bek tumani, Temur Malik–Do‘rmon yo‘li ko‘chalari kesishgan chorrahada haydovchi S.R. (1996-yilda tug‘ilgan) Matiz avtomobilini boshqarayotib, qarama–qarshi yo‘nalishdan harakatlanib kelayotgan haydovchi A.T. (1994-yilda tug‘ilgan) boshqaruvidagi Lacetti avtomobilini o‘tkazib yubormagani oqibatida YTH sodir bo‘lgan.
Oqibatda Matiz avtomobili yo‘lovchisi Z.M. (1956-yilda tug‘ilgan) olgan og‘ir tan jarohatlari tufayli voqea joyida vafot etgan. Shuningdek Matiz hamda Lacetti haydovchilari va Matiz avtomobili yo‘lovchilari U.Z. (1981-yilda tug‘ilgan) va Z.O. (2015-yilda tug‘ilgan) tan jarohatlari olib shifoxonaga yotqizilgan.
Mazkur YTH yuzasidan Toshkent shahar IIBB huzuridagi TB tomonidan dastlabki tergov harakatlari olib borilmoqda.
Zangiotada 2 ta Matiz va bitta Spark ishtirokida YTH sodir bo‘ldi.
Toshkent viloyati Zangiota tumani ichki yo‘llarida 2 ta Matiz va bitta Spark avtomobili ishtirokida yo‘l-transport hodisasi sodir bo‘lgan.
Matiz va Spark o‘z yo‘nalishida kelayotgan vaqtda qarama-qarshi tomonda harakatlangan Matiz 2 avtomobil yo‘liga chiqib ketadi va ular bilan to‘qnashadi.
Dastlabki surishtiruvlarga ko‘ra, qarama-qarshi yo‘nalishga chiqib ketgan haydovchi qattiq mast ekani aniqlangan.
Urgutda Nexia-3 piyodani urib ketdi.
2021-yil 28-noyabr kuni soat 06:30 larda Urgut tumani “A’lo xotin” MFY hududidan o‘tuvchi 4R-50 avtomobil yo‘lining 21-kilometrida Nexia-3 avtomobili yuqori tezlikda oldinda yo‘lini kesib o‘tayotgan piyodani urib ketgan.
Oqibatda piyoda vafot etgan.
Sirdaryoda Gentra’ning 2 yo‘lovchisi jarohatlandi.
2021-yil 11-dekabr kuni taxminan soat 15:30 larda Sirdaryo viloyati Mirzaobod tumani hududidan o‘tuvchi M-34 xalqaro ahamiyatga ega yo‘lning 128-kilometrida Gentra avtomobili haydovchisi boshqaruvni yo‘qotib, YTH sodir etgan.
Oqibatda mashina ichidagi ikki yo‘lovchi tan jarohati olib shifoxonaga yotqizilgan.
Holat yuzasidan tergov jarayonlari olib borilmoqda.
Oqoltin tumanida Lada Largus Isuzu’ga borib urildi.
2021-yilning 10-dekabr kuni soat 10:20 da Sirdaryo viloyati Oqoltin tumanida o‘tuvchi M-39 avtomobil yo‘lining 931-kilometrida Toshkent–Termiz yo‘nalishida harakatlanib ketayotgan Lada Largus xuddi shu yo‘nalishda harakatlanib ketayotgan Isuzu yuk mashinasining orqasiga urilgan.
Oqibatda Lada Largus haydovchisi va yo‘lovchisi shifoxonaga yotqizilgan.
Izoh (0)