Farg‘ona viloyati Qo‘qon shahrida 8-dekabr kuni voyaga yetmagan bola o‘zganing “Gaz-3102” mashinasini o‘g‘irladi, deb xabar bermoqda Tergov departamenti.
Ma’lum qilinishicha, shu kuni soat 20:35 atrofida Qo‘qon shahrida yashovchi 60 yoshli R.M. Farg‘ona viloyat Ichki ishlar boshqarmasiga murojaat qilib, Sharq mavzesi 9-sonli ko‘p qavatli uy yonida joylashgan avtoturargohdan o‘zining “Gaz-3102” mashinasi noma’lum shaxslar tomonidan olib qochib ketilganini ma’lum qilgan.
Olib borilgan qidiruv ishlari natijasida jinoyatni voyaga yetmagan 16 yoshli T.O. qilgani aniqlangan. U mashina eshiklarini kalit tanlash yo‘li bilan ochib, qulfni buzib, elektr kabellarni ulash yo‘li bilan o‘t oldirgan va olib qochib ketgan. U transport vositasini Buvayda tumani Yangiqo‘rg‘on qishlog‘ida yashovchi P.E.ga akasining qarzi evaziga garovga berib yuborgan.
Qayd etilishicha, mashina P.E.dan xolislar ishtirokida ashyoviy dalil sifatida olingan.
Ta’kidlanishicha, holat yuzasidan T.O.ga nisbatan Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilgan. Hozirda tergov harakatlari davom etmoqda.
Mazkur modda bilan aybdor deb topilgan shaxs besh yildan o‘n yilgacha ozodlikdan mahrum qilish bilan jazolanadi.
Izoh (0)