Andijonda qizining nomusiga tegib, unga uylanmagan yigitni bo‘g‘ib o‘ldirgan otaga sud hukmi o‘qildi

Jinoyat ishlari bo‘yicha Jalaquduq tuman sudi tomonidan voyaga yetmagan qizining nomusiga tegib, unga uylanmagan yigitni uyiga chaqirib, bo‘g‘ib o‘ldirgan otaga nisbatan sud hukmi o‘qildi. Bu haqda “Daryo”ga Andijon viloyat sudi axborot xizmati xabar berdi.

Ma’lum bo‘lishicha, sudlanuvchi A.Sh.ning 2003-yilda tug‘ilgan qizi M.Sh. 2020-yilning o‘rtalarida Andijon shahrida yashovchi Sh.I. (2000-yilda tug‘ilgan) bilan jiyani M. orqali telefonda tanishgan. Dastlab raqam egasini so‘rab qo‘ng‘iroq qilgan yigit sobiq sevgilisining turmushga chiqib ketganini eshitib, agarda telefon qilganida u bilan gaplashib turmasa, jiyani M.ning uyiga borib, oilasini buzishini aytib, asta-sekin qizning boshini aylantiradi. Odatiy uchrashuvlarning birida yigit M.Sh.ni mashinasiga majburlab chiqarib, tinchlanib olishi uchun suv beradi.

“2020-yilning 20-noyabr kuni uyda akamning qo‘pol munosabatda bo‘lganidan ranjib, ko‘chaga chiqdim. Yo‘lda ketayotganimda Sh.I.ni ko‘rib qoldim. U nima bo‘lganini so‘rab, meni tinchlantirishga harakat qildi. Chiqmayman, desam ham majburlab mashinasiga o‘tqazdi. O‘zimga kelib olishim uchun suv berdi. Suvni ichganimdan so‘ng o‘zimni boshqacha his qila boshladim. Undan keyin nima bo‘lganini eslolmayman. Hushimga kelganimda boshqa bir joyda, birovning uyida ekanligimni ko‘rdim. Nomusim toptalgan edi. Ertasiga biz qolgan joyga IIB xodimlari kelishib, uyimga qaytarishdi. Mana shundan so‘ng mashmashalar boshlanib, hech kim xayoliga keltirmagan jinoyat sodir bo‘ldi”, — deydi M.Sh.

Qizining nomusi toptalganidan xabar topgan oila vakillari yigitning va uning yaqinlariga to‘yni tezlatish orqali isnoddan qutulishga harakat qilishadi. Biroq yigit agar uy va mashina olib berishmasa, qiziga uylanmasligini aytib, bir nechta shartlarni qo‘yadi. Oila sha’nini oqlash uchun qizning otasi 2021-yilning 17-mayida qizi orqali Sh.I.ni to‘y haqida gaplashib olish maqsadi borligini aytib, o‘z xonadoniga chaqiradi.

Mehmonga kelgan Sh.I. mehmonxonaga kirib, o‘tirar-o‘tirmas yuziga urilgan choynak zarbidan yerga yiqiladi. Yigit faol qarshilik ko‘rsatishiga qaramasdan qizning otasi xonada bo‘lgan xo‘jalik pichog‘i bilan uning turli joylariga urib, yengil tan jarohati yetkazgan. Bundan ham qanoatlanmasdan yashash xonadonining tovuq boqish joyida bo‘lgan simni olib kirib, yigitning bo‘ynidan sim bilan bo‘g‘ib, uni qasddan o‘ldirgan.

“Qiz o‘stirish oson emas. Qizimni men ham asrab-avaylab voyaga yetkazdim. Afsuski, men va oilamning bee’tiborligi sabab qizimiz yosh bo‘la turib, xato qildi. Sh.I. uning nomusiga tegganini eshitib, o‘zimga kelolmadim. U ham mayli, voqeadan uch kun oldin qizimni yuzlari ko‘kargan holatda ko‘rib, onasidan nima bo‘lganini so‘raganimda, yaxshi ko‘rgan yigiti urganligini aytganida ota bo‘lib g‘ururim bu xo‘rliklarni ko‘tarolmadi. Shunda ham masalani tinch yo‘l bilan yechishga harakat qildim. Ammo yigit qizim bilan bo‘lgan voqeani telefoniga yozib olgani, shularni internetga chiqarib yuborishini aytganidan keyin o‘zimni tutib turolmasdan, oilam va qizimning sha’ni uchun shu ishga qo‘l urdim”, — deya qizning otasi A.Sh. sudda o‘z iqrorligini bildirgan.

Sud ishini ko‘rib chiqqan sudya Nozimjon Parpiyev A.Sh.ni Jinoyat kodeksining 97-moddasi (qasddan odam o‘ldirish) 1-qismida nazarda tutilgan jinoyatni sodir qilganlikda aybli deb topgan hamda unga nisbatan 12 yil muddatga ozodlikdan mahrum qilish jazosini tayinlagan.

Avvalroq Andijonda otasi tomonidan muntazam zo‘rlab kelinganini aytgan qizning vajlari tasdiqlanmagani haqida xabar berilgan edi.