“Tashqi mehnat migratsiyasi to‘g‘risida”gi qonun loyihasi deputatlar tomonidan birinchi o‘qishda qabul qilindi. Bu haqda Oliy Majlis Qonunchilik palatasi deputati Rasul Kusherbayev o‘zining Telegram kanali orqali ma’lum qildi.
Qonun loyihasining maqsadi quyidagilardan iborat:
- tashqi mehnat migratsiyasi sohasidagi munosabatlarni qonun darajasida mustahkamlash;
- xalqaro hujjatlardagi qoidalarning, xususan, majburiy mehnatga, migrantlarning sog‘lig‘iga ziyon yetkazuvchi sharoitlarda ishlash uchun jalb etishga yo‘l qo‘ymaslik kabi qoidalarni milliy qonunga implementatsiya qilish;
- tashqi mehnat migratsiyasi sohasidagi davlat organlari va nodavlat notijorat tashkilotlarining vakolatlarini belgilash;
- fuqarolarning mamlakat tashqarisidagi faoliyatini tashkil etish, ularni uyushgan holda ishga joylashtirish hamda chet ellik fuqarolarni O‘zbekistonda mehnat qilish uchun jalb etishning huquqiy mexanizmlarini belgilash.
“Mazkur mazmundagi qonunni qabul qilish bir qator siyosiy partiyalar, shu jumladan, O‘zLiDePning saylovoldi platformasida ham belgilangan edi. E’tiborli jihati shundaki, qonun loyihasida hukumat va vakolatli davlat organlariga mehnat migrantlari va ularning oila a’zolarini ijtimoiy qo‘llab-quvvatlash, sharoitlarini yaxshilash borasida choralar ko‘rish vazifasi yuklatilmoqda”, — deb yozadi deputat.
Avvalroq Rossiyada o‘zbekistonlik mehnat migrantlarini ishga jalb etish tartibi soddalashtirilishi, o‘zbekistonliklarning 1,7 million nafari chet elda, asosan, Rossiya va Qozog‘istonda mehnat qilayotgani to‘g‘risida xabar berilgandi.
Izoh (0)