Жиноят ишлари бўйича Жалақудуқ туман суди томонидан вояга етмаган қизининг номусига тегиб, унга уйланмаган йигитни уйига чақириб, бўғиб ўлдирган отага нисбатан суд ҳукми ўқилди. Бу ҳақда «Дарё»га Андижон вилоят суди ахборот хизмати хабар берди.
Маълум бўлишича, судланувчи А.Ш.нинг 2003 йилда туғилган қизи М.Ш. 2020 йилнинг ўрталарида Андижон шаҳрида яшовчи Ш.И. (2000 йилда туғилган) билан жияни М. орқали телефонда танишган. Дастлаб рақам эгасини сўраб қўнғироқ қилган йигит собиқ севгилисининг турмушга чиқиб кетганини эшитиб, агарда телефон қилганида у билан гаплашиб турмаса, жияни М.нинг уйига бориб, оиласини бузишини айтиб, аста-секин қизнинг бошини айлантиради. Одатий учрашувларнинг бирида йигит М.Ш.ни машинасига мажбурлаб чиқариб, тинчланиб олиши учун сув беради.
«2020 йилнинг 20 ноябрь куни уйда акамнинг қўпол муносабатда бўлганидан ранжиб, кўчага чиқдим. Йўлда кетаётганимда Ш.И.ни кўриб қолдим. У нима бўлганини сўраб, мени тинчлантиришга ҳаракат қилди. Чиқмайман, десам ҳам мажбурлаб машинасига ўтқазди. Ўзимга келиб олишим учун сув берди. Сувни ичганимдан сўнг ўзимни бошқача ҳис қила бошладим. Ундан кейин нима бўлганини эслолмайман. Ҳушимга келганимда бошқа бир жойда, бировнинг уйида эканлигимни кўрдим. Номусим топталган эди. Эртасига биз қолган жойга ИИБ ходимлари келишиб, уйимга қайтаришди. Мана шундан сўнг машмашалар бошланиб, ҳеч ким хаёлига келтирмаган жиноят содир бўлди», — дейди М.Ш.
Қизининг номуси топталганидан хабар топган оила вакиллари йигитнинг ва унинг яқинларига тўйни тезлатиш орқали исноддан қутулишга ҳаракат қилишади. Бироқ йигит агар уй ва машина олиб беришмаса, қизига уйланмаслигини айтиб, бир нечта шартларни қўяди. Оила шаънини оқлаш учун қизнинг отаси 2021 йилнинг 17 майида қизи орқали Ш.И.ни тўй ҳақида гаплашиб олиш мақсади борлигини айтиб, ўз хонадонига чақиради.
Меҳмонга келган Ш.И. меҳмонхонага кириб, ўтирар-ўтирмас юзига урилган чойнак зарбидан ерга йиқилади. Йигит фаол қаршилик кўрсатишига қарамасдан қизнинг отаси хонада бўлган хўжалик пичоғи билан унинг турли жойларига уриб, енгил тан жароҳати етказган. Бундан ҳам қаноатланмасдан яшаш хонадонининг товуқ боқиш жойида бўлган симни олиб кириб, йигитнинг бўйнидан сим билан бўғиб, уни қасддан ўлдирган.
«Қиз ўстириш осон эмас. Қизимни мен ҳам асраб-авайлаб вояга етказдим. Афсуски, мен ва оиламнинг беэътиборлиги сабаб қизимиз ёш бўла туриб, хато қилди. Ш.И. унинг номусига тегганини эшитиб, ўзимга келолмадим. У ҳам майли, воқеадан уч кун олдин қизимни юзлари кўкарган ҳолатда кўриб, онасидан нима бўлганини сўраганимда, яхши кўрган йигити урганлигини айтганида ота бўлиб ғурурим бу хўрликларни кўтаролмади. Шунда ҳам масалани тинч йўл билан ечишга ҳаракат қилдим. Аммо йигит қизим билан бўлган воқеани телефонига ёзиб олгани, шуларни интернетга чиқариб юборишини айтганидан кейин ўзимни тутиб туролмасдан, оилам ва қизимнинг шаъни учун шу ишга қўл урдим», — дея қизнинг отаси А.Ш. судда ўз иқрорлигини билдирган.
Суд ишини кўриб чиққан судья Нозимжон Парпиев А.Ш.ни Жиноят кодексининг 97-моддаси (қасддан одам ўлдириш) 1-қисмида назарда тутилган жиноятни содир қилганликда айбли деб топган ҳамда унга нисбатан 12 йил муддатга озодликдан маҳрум қилиш жазосини тайинлаган.
Аввалроқ Андижонда отаси томонидан мунтазам зўрлаб келинганини айтган қизнинг важлари тасдиқланмагани ҳақида хабар берилган эди.
Мавзуга доир:
- Хотинини ўлдириб, кўмиб қўйгани учун қамалиб чиққан шахс уйланиш ваъдасида турмагани учун Бўстонлиқда бетон бўлагига боғланган ҳолда каналга ташлаб юборилди
- Деновда уйланиш учун 20 ёшли қизни олиб қочган шахсга жиноят иши қўзғатилди
- Қорақалпоғистонлик эркак 24 ёшли қизга уйланиш учун уни олиб қочди. Ҳолат юзасидан жиноят иши қўзғатилган
- Наманганда икки йигит томонидан олиб қочилган 16 ёшли қиз ўзини машинадан ташлаб ҳалок бўлди
Изоҳ (0)