Qashqadaryoda YPX xodimining faoliyatiga qarshilik ko‘rsatgan qoidabuzar haydovchi 10 sutkaga qamaldi, deb xabar berdi IIV YHXBB axborot xizmati.
Ijtimoiy tarmoqlarda Qashqadaryo viloyati Chiroqchi tumanidan o‘tgan yo‘lda multiradar o‘rnatilgan YPX avtomobili belgi bo‘lmagan joyda ishlayotgani aytilgan video tarqaldi. Ma’lum qilinishicha, holat 9-dekabr kuni sodir bo‘lgan. YPX xodimi N.Tilakov multiradar moslamasi bilan jihozlangan avtomobilda xizmat olib borayotgan vaqtda Cobalt rusumli avtomobil haydovchisi tezlik qoidalarini buzgan.
Haydovchi xodimning yoniga kelib, tezlikni me’yordan oshirgani bo‘yicha qayd etilgan qoidabuzarlikni o‘chirishini so‘rab, unga bir qancha e’tirozlar bildirgan. Ushbu yo‘lda harakatlanayotgan boshqa haydovchilar ham ularning yoniga to‘xtagan. Norozi kayfiyatdagi haydovchi ushbu fuqarolarga ham xodim noto‘g‘ri xizmat olib borayotganini ta’kidlab, xodimning faoliyatiga xalaqit bergan.
Qashqadaryo viloyati IIB YHXB mas’ullari tomonidan holat bo‘yicha tegishli hujjatlar to‘plangan va ish 13-dekabr kuni Jinoyat ishlari bo‘yicha Chiroqchi tumani sudida o‘rganib chiqilgan.
Fuqaro Sh.A. Ma’muriy javobgarlik to‘g‘risidagi kodeksning 195-moddasida (ichki ishlar organlari xodimlarining o‘z xizmat burchlarini bajarishlariga qarshilik ko‘rsatish) ko‘rsatib o‘tilgan huquqbuzarlikni sodir etganlikda aybdor deb topilgan va unga nisbatan 10 sutka ma’muriy qamoq jazosi tayinlangan.
Avvalroq Toshkentda YPX xodimlariga faol qarshilik ko‘rsatgan erkakka nisbatan jinoyat ishi ochilgani, Toshkentda YPX xodimlaridan qochishga uringan Spark haydovchisi ushlangani to‘g‘risida xabar berilgandi.
Izoh (0)