Denovda o‘ziga tanish 20 yoshli qiz S.X.ni olib qochib, unga turmushga chiqishga undagan 28 yoshli yigitga jinoyat ishi qo‘zg‘atildi. Bu haqda IIV Tergov departamenti xabar berdi.
Ma’lum bo’lishicha, 4-mart kuni soat 10:30 larda Denov tumani “O‘rikzor MFY” hududida qizning 28 yoshli tanishi A.R. o‘zining Spark’ida uning oldiga kelib to‘xtagan. So‘ng ikki noma’lum shaxs bilan unga nisbatan kuch ishlatib, avtomashinasiga o‘tirishga majbur qilgan.
Ikki nafar sherigi yo‘lda mashinadan tushib qolganidan so‘ng, “Menga erga tegsang, uyingga olib borib qo‘yaman” deb shart qo‘yib, olib qochib ketgan. Qiz undan qochib ketish maqsadida A.R.ga turmushga chiqishga rozilik bergan, ota-onasini ham rozi qilishga va’da berib, uning qo‘lidan qochib qutulgan.
Shundan so‘ng qiz tuman IIO FMB boshlig‘i nomiga ariza bilan murojaat qilib, bo‘lgan voqeani aytib bergan.
Holat yuzasidan Denov tumani IIO FMB huzuridagi Tergov bo‘limi tomonidan Jinoyat kodeksining 136-moddasi (ayolni erga tegishga majbur qilish yoki uning erga tegishiga to‘sqinlik qilish) bilan jinoyat ishi qo‘zg‘atilgan. Ushbu moddada bazaviy hisoblash miqdorining 25 baravarigacha miqdorda jarima yoki 360 soatgacha majburiy jamoat ishlari yoki 3 yilgacha axloq tuzatish ishlari yoxud 1 yildan 3 yilgacha ozodlikni cheklash yoki 3 yilgacha ozodlikdan mahrum qilish jazosi belgilangan.
Dastlabki tergov davomida A.R. S.X.ning erga tegib ketmasligi uchun olib qochganini, uning sheriklari 25 yoshli Z.S. hamda 18 yoshli A.E. ekanligini ma’lum qilgan.
Hozirda tergov harakatlari olib borilmoqda.
Izoh (0)