Jahon futbolida ko‘plab mashhur egizak o‘yinchilarni uchratish mumkin. Bu futbolda kamdan-kam bo‘lsa ham uchrab turadigan holat. “Daryo” futbol olamidagi mashhur egizak futbolchilar haqida ma’lumot beradi.
Dmitriy va Kirill Kombarov
Yosh Kombarovlarni 1993-yilda otasi “Spartak” sport maktabiga olib boradi. 6 yoshni qarshi olgan yigitlar o‘sha yerda futbol sirlarini o‘rgana boshlaydi. 2000-yilda “qizil-oqlar” murabbiyi ularni iste’dodi yo‘q deb hisoblaganidan so‘ng, egizaklar Moskvaning “Dinamo”siga o‘tib ketdi. Poytaxtning boshqa klubida Kombarovlar katta futbolda debyutini o‘tkazdi.
Dmitriy sal oldinroq — 2005-yil 13-iyulda Rossiya Kubogi doirasida Bryanskning “Dinamo”siga qarshi o‘yinda, Kirill — 2006-yil 20-sentabrda “Lokomotiv”ga qarshi Kubok o‘yinida debyut qildi. 2010-yilda Kombarovlar “Spartak”ka qaytdi.
Dmitriy 2019-yilga qadar “Spartak” sharafini himoya qildi. Umumiy hisobda 274 ta o‘yinda ishtirok etdi va 27 ta gol urishga muvaffaq bo‘ldi. Himoyachi uchun bu yomon natija emas. 2019-yil 26-iyunda Kombarov “Krilya Sovetov” safiga o‘tib ketadi.
Kirill egizagidan farqli ravishda 2014-yildayoq “Torpedo” safiga yo‘l oladi. Undan so‘ng “Spartak-2”, “Tom” va “Arsenal” (Tula) jamoalarida faoliyat olib borgan Kombarov 2021-yilda butsisini mixga ilganini e’lon qildi. Hozirda Kirill Tulaning “Arsenal-2” jamoasida sport direktori lavozimida faoliyat olib bormoqda.
Hamit va Xalil Oltinto‘p
Gelzenkirxenda tavallud topgan turk egizaklar Germaniya zaminida futbol sirlarini o‘rgangan. Egizaklarning ilk professional klubi Germaniyaning beshinchi ligasi vakili “Vattenshayd 09” bo‘lgan. 2000-yildan 2003-yilga qadar ushbu jamoa sharafini himoya qilgan Hamit va Xalilning shundan so‘ng yo‘llari ayrilgan. Hamit “Shalke-04” jamoasiga, Xalil esa “Kayzerslautern”ga o‘tib ketadi.
Egizaklar 2006/07-yilgi mavsum yana bir jamoa safida o‘ynashga muvaffaq bo‘ladi. 2006-yilda Xalil “Shalke” jamoasiga qo‘shiladi. 2007-yilda esa Hamit “Bavariya”ning taklifini qabul qiladi va myunxenliklar futbolchisiga aylanadi.
Hamit Oltinto‘pning faoliyati egizinikiga qaraganda yorqinroq kechdi. “Bavariya”dan so‘ng “Real”, “Galatasaroy” kabi jamoalarda faoliyat olib bordi. Xalil esa “Shalke-04”dan keyin “Ayntraxt”, “Trabzonspor”, “Augsburg”, “Slaviya” sharafini himoya qilib, undan so‘ng “Kayzerslautern”ga qaytdi.
Egizak Oltinto‘plar 2018-yilda faoliyatini yakunlaganini e’lon qildi.
Hamit Oltinto‘p 2019-yildan buyon Turkiya terma jamoasida sport direktori lavozimida, Xalil Oltinto‘p esa “Bavariya U-17” jamoasi bosh murabbiy sifatida faoliyat olib bormoqda.
Aleksey va Vasiliy Berezutskiy
Egizak Berezutskiylar Moskvaning “SSKA” jamoasi sharafini uzoq yillar mobaynida himoya qilib kelgan. Aka-ukalar “Smena” sport maktabida futbol sirlarini o‘rganishni boshlagan va ilk professional shartnomalarini “Torpedo-ZIL” jamoasi bilan imzolagan. Keyin Aleksey 2001-yilda, Vasiliy esa 2002-yilda “SSKA” safiga kelib qo‘shildi va faoliyatining oxirigacha o‘sha yerda qoldi. “Armiyachilar”ning afsonasiga aylangan egizaklar jamoa bilan 6 marta Rossiya chempionligini qo‘lga kiritgan.
Himoyachilar Rossiya terma jamoasida ham munosib ishtirok etgan. Terma jamoa bilan Yevro—2008 musobaqasining bronza medali sohibiga aylangan.
Aleksey Berezutskiy 2018-yil 21-iyulda faoliyatini yakunlaganini e’lon qildi. 2021-yil 15-iyun sanasidan boshlab “SSKA”ning bosh murabbiyi sifatida ishlamoqda.
Vasiliy Berezutskiy ham 2018-yilda butsisini mixga ildi. 2021-yilning 20-aprelida “Krasnodar” jamoasining murabbiylar shtabiga qabul qilindi.
Lars va Sven Bender
Germaniyaning yosh futbolchilarni yetkazib berish dasturi hattoki egizaklarni ham terma jamoa darajasida yetishtirib bera oladi. Rozenhaymda tug‘ilgan Lars va Sven Bender “Brannenburg” yoshlar jamoasidan “Myunxen-1860”ning asosiy jamoasiga qadar birgalikda harakat qildi. Ammo klub yosh iste’dodlarni jamoada olib qololmadi. 2009-yilda Lars “Bayer”ga, Sven “Borussiya D” safiga o‘tib ketdi.
Svenning faoliyatida yorqin lahzalar ko‘proq bo‘ldi. Futbolchi Yurgen Klopp qo‘l ostida ikki marta Bundesligani va bir marta Germaniya Kubogi qo‘lga kiritdi. 2017-yilda Sven ham akasining yoniga, “Bayer”ga o‘tadi. Egizaklar 4 yil davomida bir jamoada to‘p suradi.
2020/21-yilgi mavsum yakuniga yetgach, Lars va Sven faoliyatini yakunlaganini e’lon qildi.
Rafael va Fabio da Silva
Braziliyalik egizaklar faoliyatini “Fluminense” jamoasida boshlagan. 2005-yilda Gongkongda o‘tkazilgan yoshlar musobaqasida “Manchester Yunayted” akademiyasining o‘sha vaqtdagi rahbari Les Kershou yosh iste’dodlarga e’tibor qaratadi. Rafael va Fabio 2007-yil fevral oyida “qizil iblislar” bilan shartnoma imzolaydi.
2008-yilda esa egizaklar asosiy jamoada debyut qilishga muvaffaq bo‘ladi. Ser Aleks Fergyuson mashg‘ulotlarda doim ikkalasini adashtirib qo‘yishi kulgilarga sabab bo‘lardi.
Rafael 7 yil davomida “Manchester Yunayted” sharafini himoya qildi. Undan so‘ng “Lion” (2015—2020-yillar), “Istanbul Bashakshehir” (2020-2021) safida o‘ynashga ham ulgurdi. 2021-yil 8-sentabrdan buyon o‘z yurti Braziliyaning “Botafogo” jamoasida faoliyat olib bormoqda.
Fabio esa 2014-yilga qadar mankunianliklar libosida harakat qildi. 2012-yildan 2013-yilga qadar “KPR” jamoasida ijarada o‘ynab keldi. Aleks Fergyuson iste’foga chiqqanidan so‘ng, Fabio ham jamoada uzoq qolmadi va 2014-yilda “Kardiff Siti”ga o‘tib ketdi. 2016-yilda “Midlsbro” himoyachini xarid qildi. 2018-yilda esa da Silvalarning kichigi Fransiyaga ketishga qaror qildi. Hozirgi kunga qadar Fabio “Nant” jamoasida o‘ynayapti.
Ronald va Frank de Bur
Futbol tarixidagi eng sovrindor egizaklardan biri. Ularning asosiy muvaffaqiyati “Ayaks” bilan bog‘liq. Amsterdamliklar safida Ronald va Frank besh marta Niderlandiya chempionligini, uch marta mamlakat Kubogini qo‘lga kiritgan. 1995-yilda esa aka-ukalar “Ayaks” bilan birgalikda Chempionlar Ligasi sovriniga ega chiqqan. 1998-yilda “Barselona” egizaklarni xarid qiladi. De Burlar kataloniyaliklar bilan 1999-yilda Ispaniya chempioni unvoniga ham ega bo‘ladi.
2000-yilda Frank Shotlandiyaning “Reynjers” safiga o‘tib ketadi. Ronald esa 2004-yilda ushbu jamoa safiga borib qo‘shiladi. O‘sha yilning o‘zida ikkalasi ham Shotlandiyadan Qatarga ketadi. “Ar-Rayan” va “Ash-Shamal” safida o‘ynagan aka-ukalar Qatarda faoliyatini yakunlaydi. Avvaliga Ronald 2006-yilda butsisini mixga ilgan bo‘lsa, Frank oradan ikki yil o‘tib futbol bilan xayrlashdi.
Ronald de Bur 2010-2011-yillarda Qatar U-23 terma jamoasida murabbiy yordamchisi sifatida faoliyat olib borgan.
Frank esa 2007-yilda “Ayaks”da bosh murabbiy yordamchisi sifatida ish boshlagan. 2010-yilda amsterdamliklarning bosh murabbiyiga aylandi. 2016-yilda “Inter”, 2017 da “Kristal Pelas”, 2019-yilda esa “Atlanta Yunayted” jamoalarini boshqardi. 2020-yilda Niderlandiya terma jamoasiga bosh murabbiy etib tayinlandi. Yevro—2020 da jamoa bilan guruh bosqichini ko‘tarinki ruhda yakunladi. 3 o‘yinda 3 g‘alaba qayd etgan niderlandlar 1/8 finalda Chexiyaga 0:2 hisobida mag‘lub bo‘lib, musobaqani tark etdi. 2021-yil 29-iyunda rahbariyat Frank de Burni iste’foga chiqardi.
Izoh (0)