Dunyo va o‘zbek sportiga oid 7-dekabrning eng muhim xabarlari dayjesti bilan tanishing.
O‘zbekiston
Superliga futbolchilari mavsum avvalida normativ topshiradi
O‘FA Murabbiylar kengashi 6-noyabr kuni yig‘ilish o‘tkazdi. Unda Superliga futbolchilarining mavsum boshlanishidan oldin jismoniy tayyorgarligi masalasida testlarini joriy etish, chempionat klublarida mashg‘ulotlar jarayonini boshqarishda innovatsion texnologiyalardan foydalanish masalalari muhokama qilindi.
“Zamonaviy texnologiyalarga tayangan holda, O‘zbekistonning iqlimiga mos keladigan jismoniy tayyorgarlik test sinovlari uchun dastur ishlab chiqiladi. Ushbu dastur 3 yilga mo‘ljallangan bo‘lib, har bir futbolchining jismoniy ko‘rsatkichlarini bosqichma bosqich o‘sishiga xizmat qiladi”, — degan Ravshan Ermatov.
Bu jarayon, o‘z navbatida, futbolchilarga mas’uliyat yuklashi, buning natijasida ular mashg‘ulot va o‘yinlarda borini berib harakat qilishlari mumkinligi qayd etildi.
Ertaga boks bo‘yicha kattalar o‘rtasida O‘zbekiston chempionati start oladi
Toshkentdagi “Universal” sport majmuasida boks bo‘yicha kattalar o‘rtasidagi O‘zbekiston chempionati 8—14-dekabr kunlari bo‘lib o‘tadi.
Unda mamlakatning turli hududlaridan bo‘lgan 500 nafarga yaqin bokschilar ishtirok etadi. Erkaklar o‘rtasida 13 ta, ayollar ishtirokida esa 11 ta vazn toifasida janglar bo‘lib o‘tadi. Ishtirokchilar qatorida Olimpiya o‘yinlari qatnashchilari, Jahon va Osiyo chempionati sovrindorlarini ham ko‘rish mumkinligi aytilmoqda.
O‘zbekiston Superligasining 2022-yilgi mavsumi boshlanish sanasi ma’lum bo‘ldi
Superliganing yangi mavsumi esa 2-mart kuni start oladi. Chempionatda 14 ta jamoa ishtirok etadi. Bu haqda PFL matbuot xizmati ma’lum qildi.
O‘zbekiston Superkubogi bahsi 26-fevral sanasida bo‘lib o‘tadi. Unda chempion sifatida “Paxtakor” va Kubok sohibi sifatida “Nasaf” o‘zaro kurash olib boradi.
Jahon
Koronavirus Yevropa futbolida yana “sahnaga chiqmoqda”“Tottenhem” klubida koronavirus o‘chog‘i paydo bo‘lgani aytilmoqda. The Athletic nashrining xabar qilishicha, “shporlar”ning 6 nafar futbolchisi va ikki nafar murabbiylar shtabi vakilida virus aniqlangan. Kasallangan haqidagi ma’lumotlar ochiqlanmagan.
Endilikda ular 10 kun mobaynida izolyatsiyada bo‘ladi. Shu tariqa zararlangan futbolchilar London klubining yaqin oradagi uchta o‘yinini o‘tkazib yuboradi.
“Portu” klubi sardori Pepeda ham koronavirus aniqlangan. Futbolchi Chempionlar Ligasi 6-turi doirasidagi “Atletiko”ga qarshi o‘yinni o‘tkazib yuboradi.
Avvalroq COVID bilan bog‘liq vaziyat sabab “Bavariya” va “Barselona” jamoalari o‘rtasidagi uchrashuv tomoshabinlarsiz o‘tkazilishi xabar qilingandi.
Joze Mourinyo “Roma”dan ketmaydi
Rimliklar klubining qoniqarsiz natijalariga qaramasdan, jamoa rahbariyati Joze Mourinyoni iste’foga chiqarish niyatida emas.
Jurnalist Fabrisio Romanoga ko‘ra, “Roma” xo‘jayinlari va rahbariyati portugaliyalik mutaxassisga to‘liq ishonmoqda. Uning Rim klubidagi kelajagi xavf ostida emas.
“Roma” yanvar oyida tarkibni kuchaytirmoqchi. Ayni vaqtda jamoa A Seriya 16-turidan keyin 25 ochko bilan 8-o‘rinda bormoqda.
Mutaxassisning “bo‘rilar” bilan amaldagi kelishuvi 2024-yilning yoziga qadar mo‘ljallangan.
“Barselona” Torres uchun 45 mln to‘lamoqchi, “Manchester Siti” esa 60 million so‘ramoqda
“Barselona” va “Manchester Siti” yarim himoyachi Ferran Torres transferi borasida muzokaralarni davom ettirmoqda.
Mundo Deportivo o‘z manbalariga tayanib xabar qilishicha, katalon klubi inglizlar bilan kelishuvga erishishga yaqin. “Manchester Siti” futbolchi uchun 60 million yevro so‘ramoqda. “Barselona” esa 45 million yevro to‘lashga tayyor.
Katalonlar klubi va Torresning o‘zi “shaharliklar” bilan kelishuv amalga oshishiga ishonmoqda. Ferran allaqachon “Barselona” bilan 5 yillik shartnoma borasida kelishib qo‘ygan. Futbolchi “Manchester Siti”dan narxni tushirishni va uni La Ligaga qo‘yib yuborishni so‘rashga tayyor.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)