Жаҳон футболида кўплаб машҳур эгизак ўйинчиларни учратиш мумкин. Бу футболда камдан-кам бўлса ҳам учраб турадиган ҳолат. «Дарё» футбол оламидаги машҳур эгизак футболчилар ҳақида маълумот беради.
Дмитрий ва Кирилл Комбаров
Ёш Комбаровларни 1993 йилда отаси «Спартак» спорт мактабига олиб боради. 6 ёшни қарши олган йигитлар ўша ерда футбол сирларини ўргана бошлайди. 2000 йилда «қизил-оқлар» мураббийи уларни истеъдоди йўқ деб ҳисоблаганидан сўнг, эгизаклар Москванинг «Динамо»сига ўтиб кетди. Пойтахтнинг бошқа клубида Комбаровлар катта футболда дебютини ўтказди.
Дмитрий сал олдинроқ — 2005 йил 13 июлда Россия Кубоги доирасида Брянскнинг «Динамо»сига қарши ўйинда, Кирилл — 2006 йил 20 сентябрда «Локомотив»га қарши Кубок ўйинида дебют қилди. 2010 йилда Комбаровлар «Спартак»ка қайтди.
Дмитрий 2019 йилга қадар «Спартак» шарафини ҳимоя қилди. Умумий ҳисобда 274 та ўйинда иштирок этди ва 27 та гол уришга муваффақ бўлди. Ҳимоячи учун бу ёмон натижа эмас. 2019 йил 26 июнда Комбаров «Крилья Советов» сафига ўтиб кетади.
Кирилл эгизагидан фарқли равишда 2014 йилдаёқ «Торпедо» сафига йўл олади. Ундан сўнг «Спартак-2», «Том» ва «Арсенал» (Тула) жамоаларида фаолият олиб борган Комбаров 2021 йилда бутсисини михга илганини эълон қилди. Ҳозирда Кирилл Туланинг «Арсенал-2» жамоасида спорт директори лавозимида фаолият олиб бормоқда.
Ҳамит ва Халил Олтинтўп
Гелзенкирхенда таваллуд топган турк эгизаклар Германия заминида футбол сирларини ўрганган. Эгизакларнинг илк профессионал клуби Германиянинг бешинчи лигаси вакили «Ваттеншайд 09» бўлган. 2000 йилдан 2003 йилга қадар ушбу жамоа шарафини ҳимоя қилган Ҳамит ва Халилнинг шундан сўнг йўллари айрилган. Ҳамит «Шальке-04» жамоасига, Халил эса «Кайзерслаутерн»га ўтиб кетади.
Эгизаклар 2006/07 йилги мавсум яна бир жамоа сафида ўйнашга муваффақ бўлади. 2006 йилда Халил «Шалке» жамоасига қўшилади. 2007 йилда эса Ҳамит «Бавария»нинг таклифини қабул қилади ва мюнхенликлар футболчисига айланади.
Ҳамит Олтинтўпнинг фаолияти эгизиникига қараганда ёрқинроқ кечди. «Бавария»дан сўнг «Реал», «Галатасарой» каби жамоаларда фаолият олиб борди. Халил эса «Шальке-04»дан кейин «Айнтрахт», «Трабзонспор», «Аугсбург», «Славия» шарафини ҳимоя қилиб, ундан сўнг «Кайзерслаутерн»га қайтди.
Эгизак Олтинтўплар 2018 йилда фаолиятини якунлаганини эълон қилди.
Ҳамит Олтинтўп 2019 йилдан буён Туркия терма жамоасида спорт директори лавозимида, Халил Олтинтўп эса «Бавария U-17» жамоаси бош мураббий сифатида фаолият олиб бормоқда.
Алексей ва Василий Березуцкий
Эгизак Березуцкийлар Москванинг «ЦСКА» жамоаси шарафини узоқ йиллар мобайнида ҳимоя қилиб келган. Ака-укалар «Смена» спорт мактабида футбол сирларини ўрганишни бошлаган ва илк профессионал шартномаларини «Торпедо-ЗИЛ» жамоаси билан имзолаган. Кейин Алексей 2001 йилда, Василий эса 2002 йилда «ЦСКА» сафига келиб қўшилди ва фаолиятининг охиригача ўша ерда қолди. «Армиячилар»нинг афсонасига айланган эгизаклар жамоа билан 6 марта Россия чемпионлигини қўлга киритган.
Ҳимоячилар Россия терма жамоасида ҳам муносиб иштирок этган. Терма жамоа билан Евро—2008 мусобақасининг бронза медали соҳибига айланган.
Алексей Березуцкий 2018 йил 21 июлда фаолиятини якунлаганини эълон қилди. 2021 йил 15 июнь санасидан бошлаб «ЦСКА»нинг бош мураббийи сифатида ишламоқда.
Василий Березуцкий ҳам 2018 йилда бутсисини михга илди. 2021 йилнинг 20 апрелида «Краснодар» жамоасининг мураббийлар штабига қабул қилинди.
Ларс ва Свен Бендер
Германиянинг ёш футболчиларни етказиб бериш дастури ҳаттоки эгизакларни ҳам терма жамоа даражасида етиштириб бера олади. Розенҳаймда туғилган Ларс ва Свен Бендер «Бранненбург» ёшлар жамоасидан «Мюнхен-1860»нинг асосий жамоасига қадар биргаликда ҳаракат қилди. Аммо клуб ёш истеъдодларни жамоада олиб қололмади. 2009 йилда Ларс «Байер»га, Свен «Боруссия Д» сафига ўтиб кетди.
Свеннинг фаолиятида ёрқин лаҳзалар кўпроқ бўлди. Футболчи Юрген Клопп қўл остида икки марта Бундеслигани ва бир марта Германия Кубоги қўлга киритди. 2017 йилда Свен ҳам акасининг ёнига, «Байер»га ўтади. Эгизаклар 4 йил давомида бир жамоада тўп суради.
2020/21 йилги мавсум якунига етгач, Ларс ва Свен фаолиятини якунлаганини эълон қилди.
Рафаэл ва Фабио да Сильва
Бразилиялик эгизаклар фаолиятини «Флуминенсе» жамоасида бошлаган. 2005 йилда Гонгконгда ўтказилган ёшлар мусобақасида «Манчестер Юнайтед» академиясининг ўша вақтдаги раҳбари Лес Кершоу ёш истеъдодларга эътибор қаратади. Рафаэл ва Фабио 2007 йил февраль ойида «қизил иблислар» билан шартнома имзолайди.
2008 йилда эса эгизаклар асосий жамоада дебют қилишга муваффақ бўлади. Сер Алекс Фергюсон машғулотларда доим иккаласини адаштириб қўйиши кулгиларга сабаб бўларди.
Рафаэл 7 йил давомида «Манчестер Юнайтед» шарафини ҳимоя қилди. Ундан сўнг «Лион» (2015—2020 йиллар), «Истанбул Башакшеҳир» (2020-2021) сафида ўйнашга ҳам улгурди. 2021 йил 8 сентябрдан буён ўз юрти Бразилиянинг «Ботафого» жамоасида фаолият олиб бормоқда.
Фабио эса 2014 йилга қадар манкунианликлар либосида ҳаракат қилди. 2012 йилдан 2013 йилга қадар «КПР» жамоасида ижарада ўйнаб келди. Алекс Фергюсон истеъфога чиққанидан сўнг, Фабио ҳам жамоада узоқ қолмади ва 2014 йилда «Кардифф Сити»га ўтиб кетди. 2016 йилда «Мидлсбро» ҳимоячини харид қилди. 2018 йилда эса да Сильваларнинг кичиги Францияга кетишга қарор қилди. Ҳозирги кунга қадар Фабио «Нант» жамоасида ўйнаяпти.
Роналд ва Франк де Бур
Футбол тарихидаги энг совриндор эгизаклардан бири. Уларнинг асосий муваффақияти «Аякс» билан боғлиқ. Амстердамликлар сафида Роналд ва Франк беш марта Нидерландия чемпионлигини, уч марта мамлакат Кубогини қўлга киритган. 1995 йилда эса ака-укалар «Аякс» билан биргаликда Чемпионлар Лигаси совринига эга чиққан. 1998 йилда «Барселона» эгизакларни харид қилади. Де Бурлар каталонияликлар билан 1999 йилда Испания чемпиони унвонига ҳам эга бўлади.
2000 йилда Франк Шотландиянинг «Рейнжерс» сафига ўтиб кетади. Роналд эса 2004 йилда ушбу жамоа сафига бориб қўшилади. Ўша йилнинг ўзида иккаласи ҳам Шотландиядан Қатарга кетади. «Ар-Райан» ва «Аш-Шамал» сафида ўйнаган ака-укалар Қатарда фаолиятини якунлайди. Аввалига Роналд 2006 йилда бутсисини михга илган бўлса, Франк орадан икки йил ўтиб футбол билан хайрлашди.
Роналд де Бур 2010-2011 йилларда Қатар U-23 терма жамоасида мураббий ёрдамчиси сифатида фаолият олиб борган.
Франк эса 2007 йилда «Аякс»да бош мураббий ёрдамчиси сифатида иш бошлаган. 2010 йилда амстердамликларнинг бош мураббийига айланди. 2016 йилда «Интер», 2017 да «Кристал Пэлас», 2019 йилда эса «Атланта Юнайтед» жамоаларини бошқарди. 2020 йилда Нидерландия терма жамоасига бош мураббий этиб тайинланди. Евро—2020 да жамоа билан гуруҳ босқичини кўтаринки руҳда якунлади. 3 ўйинда 3 ғалаба қайд этган нидерландлар 1/8 финалда Чехияга 0:2 ҳисобида мағлуб бўлиб, мусобақани тарк этди. 2021 йил 29 июнда раҳбарият Франк де Бурни истеъфога чиқарди.
Изоҳ (0)