Dunyo va o‘zbek sportiga oid 6-dekabrning eng muhim xabarlari dayjesti bilan tanishing.
O‘zbekiston
Superliga klublari uchun qishki transfer oynasi ochildiSuperligada qishki transfer oynasi 2021-yilning 6-dekabridan 2022-yilning 26-fevral sanasiga qadar davom etadi.
PFL Superliga klublarining transferlariga cheklov qo‘ydi. Unga ko‘ra, klublar transfer oynasida 10 dan ortiq futbolchini ro‘yxatdan o‘tkaza olmaydi. Pro-Ligadan chiqqan uch jamoa uchun bu limit 15 futbolchi etib belgilangan.
Shu bilan birga Superliga jamoalari 2021-yilgi mavsumdagi o‘yinchilari, o‘zining yoshlar jamoasi vakillari va 2000-yildan keyin tug‘ilgan futbolchilar bilan cheklanmagan miqdorida shartnoma imzolashi mumkin.
Futzal bo‘yicha O‘zbekiston milliy terma jamoasining Qozog‘istonga qarshi o‘yin uchun qaydnomasi e’lon qilindi
O‘zbekiston futzal terma jamoasining dekabr oyidagi yig‘iniga jalb etilgan futbolchilar ro‘yxati ma’lum qilindi. 14 va 15-dekabr kunlari Bahodir Ahmedov shogirdlari Nur-Sulton shahrida Qozog‘iston terma jamoasiga qarshi o‘rtoqlik o‘yinlari o‘tkazadi. Mazkur yig‘inga 14 nafar futzalchi jalb etilgan.
“Nasaf” Qarshida bayramni davom ettirdi
Samarqandda o‘tgan O‘zbekiston Kubogi finalida “Paxtakor”ni mag‘lub etib, sovrindor bo‘lgan “Nasaf” 6-dekabr kuni Qarshi shahrida o‘z muxlislari bilan g‘alabani nishonladi. Jamoa Qarshi ko‘chalarini avtobusda aylangan va stadionga yo‘l olgan. “Markaziy” stadioniga 2 mingdan ortiq muxlis yig‘ilgan.
O‘zbekistonda ertaga og‘ir atletika bo‘yicha Jahon chempionati boshlanadi
Toshkent shahrida 7—17-dekabr kunlari og‘ir atletika bo‘yicha kattalar o‘rtasida Jahon chempionati bo‘lib o‘tadi. Ukraina, Bangladesh, Janubiy Koreya, Filippin, Tunis, Tailand, Malayziya kabi yigirmaga yaqin davlatlarning terma jamoalari Toshkentga yetib kelgan hamda belgilangan sport zallarida musobaqaga tayyorgarlik mashg‘ulotlarini olib bormoqda.
Jahon
IFFHS yilning eng yaxshilarini aniqladiXalqaro futbol tarixi statistikasi federatsiyasi (IFFHS) 2021-yilning eng yaxshilarini aniqlashda davom etmoqda. Avvalroq “Bavariya” forvardi Robert Levandovski yilning eng yaxshi o‘yinchisi deb topilgan, Janluiji Donnarumma (“PSJ”) esa eng yaxshi darvozabon bo‘lgandi.
Yana bir qator yo‘nalishlar bo‘yicha eng yaxshilar aniqlandi:
- Eng yaxshi murabbiy (klub miqyosida): Tomas Tuxel (“Chelsi”);
- Eng yaxshi murabbiy (terma jamoa miqyosida): Roberto Manchini (Italiya);
- Eng yaxshi pleymeyker: Kevin de Bryuyne (“Manchester Siti”);
- Eng yaxshi yosh o‘yinchi: Pedri (“Barselona”);
- Eng yaxshi hakam: Feliks Brix (Germaniya).
“Real” hujumchisi Chempionlar Ligasi doirasidagi “Inter”ga qarshi bahsni aniq o‘tkazib yuboradi. O‘yin 7-dekabr tunida bo‘lib o‘tadi.
12-dekabr kuni “Atletiko”ga qarshi kechadigan o‘yinda maydonga tushishi esa so‘roq ostida, deya xabar qilmoqda Goal.
Benzema “Real Sosyedad”ga qarshi kechgan o‘yinda jarohat olgan va uning o‘rnini Luka Yovich egallagandi.
Messining yaqinlari Pochettino va uning uslubiga shubha bilan qaramoqda
“PSJ” hujumchisi Lionel Messining yaqinlari parijliklar ustozi Maurisio Pochettinoning ishiga shubha bilan qaramoqda.
Parij klubi va Messi qoniqarsiz natijalar uchun tanqid ostiga olinmoqda. Lionelning yaqinlari esa bu holatni mutaxassisning hamon futbolchilarning pozitsiyasi borasida bir qarorga kelmagani va beqarorligi bilan bog‘lamoqda.
L’Equipe’ning xabar qilishicha, Messining atrofidagilar Pochettino va uning uslubiga shubha bilan qaramoqda. Xususan, murabbiyning juda murakkab uslubni tanlashi o‘yinchiga hush kelmayapti.
Messi Fransiya chempionatining joriy mavsumida 9 ta o‘yin o‘tkazib, bitta gol va uchta golli uzatma amalga oshirdi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)