Madridning “Real” klubi Chempionlar Ligasining 5-turida “Sherif” ustidan 3:0 hisobida g‘alaba qozonib, pley-off bosqichiga chiqdi. Seshanba tunida bo‘lib o‘tadigan “Inter”ga qarshi bahs guruhda birinchi o‘rin masalasini hal qiladi.
Shu tariqa madridliklar ketma-ket 19-marta Chempionlar Ligasining nimchorak final bosqichiga yo‘l oldi. “Real”ning nufuzli musobaqadagi 19 mavsumlik ishtiroki haqida qisqacha:
2003/04-yilgi mavsumda “Qirollik klubi” bo‘lajak chempion “Portu” bilan bir guruhdan joy olgan edi. Madridliklar Portugaliya jamoasidan tashqari “Marsel” va “Partizan”ni ortda qoldirib, guruhda birinchi o‘rinni egalladi va pley-offga yo‘l oldi. Undan so‘ng “Bavariya” taslim etildi, bo‘lajak finalchi “Monako”ga esa imkoniyat boy berildi (birinchi o‘yinda 4:2 hisobida g‘alaba qozongan bo‘lsa ham).
2004/05-yilgi Chempionlar Ligasi Madrid jamoasi uchun og‘ir kechdi: ikkinchi o‘rinni Kiyevning “Dinamo”siga boy berishi mumkin edi (6-turga qadar ikkita o‘yinda mag‘lub bo‘lib, Ukraina jamoasidan bir ochko ko‘proq jamg‘ardi), pley-off bosqichida esa “Yuventus”ga imkoniyatni boy berib, ishtirokini yakunladi.
2005/06-yilda esa ikkita yaqqol favoritlar bir guruhdan joy oladi: “Lion” va “Real”. Ikkala jamoa ham 1/8 finalga yo‘l oldi. Guruhning qolgan ishtirokchilari “Rusenborg” va “Olimpiakos”da imkoniyat yo‘q edi. Keyingi bosqichda “Arsenal” madridliklardan ustun kelib, chorak finalga yo‘l oldi.
Keyingi mavsumda ham “Real” “Lion” bilan bir guruhdan joy oldi. Kutilganidek ikkalasi ham pley-offga yo‘l oldi (“Styaua” va Kiyevning “Dinamo”si guruhda qolib ketdi). “Qirollik klubi” keyingi bosqichda “Bavariya”ga mag‘lub bo‘lib, musobaqani tark etdi.
2007/08-yilgi Chempionlar Ligasi guruh bosqichidan “Real” va “Olimpiakos” nimchorakka yo‘l oldi (“Verder” va “Latsio” kvartetning boshqa a’zolari edi). Pley-offning birinchi bosqichidayoq “Roma”ga ikkala o‘yinda ham bir xil: 1:2 hisobida imkoniyatni boy berib, musobaqa bilan xayrlashdi.
2008/09-yilgi mavsumda madridliklar “Zenit” va “BATE”ni guruhda qoldirib, “Yuventus” bilan birga pley-offga chiqdi. 1/8 finalda esa “Liverpul”ga ikki o‘yin natijasiga ko‘ra 0:5 hisobida mag‘lub bo‘lib, Chempionlar Ligasisiz qoldi.
2009/10-yilgi mavsumda esa “Milan”, “Marsel” va “Syurix”ni ortda qoldirib, guruhda birinchi o‘rinni egalladi. Ketma-ket oltinchi marta pley-offning dastlabki bosqichidayoq mag‘lub bo‘lib, musobaqani tark etdi.
2010/11-yilgi mavsumda madridliklar faqatgina qudratli “Barselona”ga yarim finalda mag‘lub bo‘ldi. Ungacha “Qirollik klubi” guruh bosqichida “Milan”, “Ayaks” va “Oser”ni ortda qoldirib, pley-offga chiqqan edi. Nimchorak va chorak finalda “Lion” hamda “Tottenhem” taslim etilgan.
YChL—2011/12 ham jamoa uchun muvaffaqiyatli o‘tdi: guruhda “Lion” (yana shu jamoa), “Ayaks” va Zagrebning “Dinamo”sidan ustun keldi. Yarim finalda Myunxenning “Bavariya”siga penaltilar seriyasiga ko‘ra mag‘lub bo‘ldi.
Keyingi mavsumda “Real” Yurgen Kloppning “Borussiya”siga total ustunlikni boy berdi. Avvaliga, nemis jamoasiga guruh bosqichi yetakchiligini taqdim etdi. Madridliklar ikkinchi o‘rinni egallagan bo‘lsa, “Ayaks” va “Manchester Siti” uchinchi va to‘rtinchi o‘rinlarni band etdi. Yarim finalning dastlabki o‘yinida dortmundliklarga 1:4 hisobida imkoniyat boy berildi. Javob o‘yinida “Real” 2:0 hisobida g‘alaba qozongan bo‘lsa-da, finalga chiqish uchun bu yetarli bo‘lmadi.
2013/14-yilgi mavsumda “Real” Karlo Anchelotti boshchiligida finalga qadar yetib bordi. Serxio Ramosning so‘nggi daqiqalarda urgan goli va “Atletiko” ustidan yorqin g‘alaba madridliklarga uzoq yillik tanaffusdan so‘ng sovrinni qo‘lga kiritishga yordam berdi. Guruh bosqichida “Galatasaroy”, “Yuventus” va “Kopengagen” bilan to‘qnash kelgan “Real” atigi 2 ochko yo‘qotdi, xolos.
2014/15-yilda Madrid jamoasi guruh bosqichida “Bazel”, “Liverpul” va “Ludogorets”ni ortda qoldirib, birinchi o‘rinni egalladi. Pley-offda bir mavsum avvalgi finaldagi raqibi “Atletiko” taslim etildi. Yarim finalda Allegri qo‘l ostidagi “Yuventus” ustun keldi va “Real” finalsiz qoldi.
2015/16-yilgi Chempionlar Ligasida Zinedin Zidan “Real”ni “shalpangquloq” sari yetaklab bordi. Guruh bosqichida “PSJ”, “Shaxtyor” va “Malmyo” bilan duch kelgan “Qirollik klubi” faqat bir o‘yinda durang natija qayd etdi va 16 ochko bilan birinchi o‘rinni egalladi. Finalda “eski qadrdon” “Atletiko” mag‘lub etildi. Bu safar jamoalar penaltilar seriyasiga qadar yetib bordi.
YChL—2016/17 da esa “Qirollik klubi” ikkinchi bor sovrindorga aylandi. Guruhda “Borussiya D”dan ortda qolgan madridliklar “Legiya” va “Sporting”dan ustun keldi. Yarim finalda Diyego Simeone shogirdlarini mag‘lub etib, finalda “Yuventus” ustidan 4:1 hisobida g‘alaba qozondi.
2017/18-yilgi mavsumda Zidan shogirdlari o‘ziga xos rekord qayd etdi: ketma-ket uchinchi bor “shalpangquloq” egasiga aylandi. Guruh bosqichida yana ikkinchi bo‘ldi, yetakchilikni “Tottenhem”ga boy bergan jamoa “Borussiya D” va “APOEL”ni ortda qoldirdi. Pley-off bosqichida “PSJ”, “Yuventus”, “Bavariya” va finalda “Liverpul” taslim etildi.
To‘rtinchi bor ketma-ket sovrinni qo‘lga kiritishning imkoni bo‘lmadi. “Roma”, “Viktoriya” va “SSKA” bilan bir guruhga tushgan madridliklar birinchi o‘rinni egallab keyingi bosqichga chiqdi. 1/8 finaldayoq “Ayaks”ga mag‘lub bo‘lib, musobaqa bilan xayrlashdi. Butun dunyo o‘shanda Frenki de Yong, Matteys de Ligt, Donni van de Bek kabi futbolchilarni tanidi.
2019/20-yilgi musobaqada ham “Real” omadsiz ishtirok etdi. Guruh bosqichida “PSJ”dan ortda qolgan bo‘lsa ham, “Bryugge” va “Galatasaroy”dan ustun keldi. Pley-offda esa “Manchester Siti”ga ikkala o‘yinda ham 1:2 hisobida mag‘lubiyatga uchradi.
2020/21-yilgi mavsumda “Real” yarim finalga qadar yetib bordi: pley-off bosqichida “Atalanta” va “Liverpul” taslim etildi, yarim finalda esa bo‘lajak chempion “Chelsi”ga mag‘lub bo‘ldi. Guruhda “Borussiya M”, “Shaxtyor” va “Inter” dog‘da qoldirilgandi.
Joriy mavsumda “Real Madrid” ketma-ket 19-marta pley-off bosqichi yo‘llanmasini qo‘lga kiritdi. “Sherif” va “Shaxtyor” ortda qoldirildi, birinchi o‘rin uchun esa 6-turda “Inter” bilan kurash olib boradi.
2024/25-yilgi mavsumdan boshlab Chempionlar Ligasi reglamenti o‘zgarishi hisobga olinsa, “Real” uzoq yillar bu natijasini yangilab borishi mumkin.
Izoh (0)