Hindistonning Tamilnad shtatida harbiy vertolyot halokatga uchradi. Bortda 14 kishi, jumladan, Hindiston Qurolli kuchlari mudofaa shtabi boshlig‘i general Bipin Ravat ham bo‘lgan. U va yana 12 kishi halok bo‘ldi, deya xabar berdi “Kommersant” Hindiston havo kuchlariga tayanib.
General Nilgiri-Xills tog‘li hududdagi harbiy kollejga yo‘l olgandi, u yerda talabalar va o‘qituvchilar oldida nutq so‘zlashi kerak edi. U bilan birga vertolyotda rafiqasi, sakkiz yo‘lovchi va to‘rt nafar ekipaj a’zosi bo‘lgan. Halokat sababi noma’lum.
“Chuqur afsus bilan ma’lum qilinadiki, general Bipin Ravat, Madxulika Ravat (generalning rafiqasi) va yana 11 kishi halok bo‘lgani aniqlandi”, — deyiladi Hindiston havo kuchlari Twitter’da. Yana bir kishi jarohat olib, kasalxonaga yotqizilgan, uning ahvoli haqida hech narsa aytilmagan.
Hindistonda Mudofaa shtab boshlig‘i lavozimi 2019-yil dekabr oyida tashkil etilgan. Ravat bu lavozimga birinchi bo‘lib tayinlangan. Mudofaa shtabi boshlig‘i Hindiston armiyasining barcha bo‘linmalari — quruqlikdagi kuchlar, havo kuchlari va dengiz flotining harakatlarini muvofiqlashtiradi.
3-dekabr kuni Salvadorning qirg‘oq zonasida bortida mamlakat mudofaa vazirining o‘g‘li Xerardo Merino bo‘lgan harbiy samolyot halokatga uchragan edi. Keyinroq Merinoning jasadi va bortning bo‘laklari topilgan. Hodisada Merinoning ikki hamrohi ham halok bo‘lgan.
8-sentabr kuni Rossiya Favqulodda vaziyatlar vaziri Yevgeniy Zinichev Krasnoyarsk o‘lkasidagi Norilsk shahridan 120 kilometr uzoqlikda joylashgan Lama ko‘lida halok bo‘lgandi. Hodisa “o‘quv mashg‘ulotlari paytida” sodir bo‘lgan. Zinichev rejissor Aleksandr Melnikni qutqarishga uringan. Zinichev bilan “jarlik chetida” turgan Melnik sirg‘alib suvga tushib ketgan. Melnik Norilskka Arktika va Shimoliy dengiz yo‘lining rivojlanishiga bag‘ishlangan yangi hujjatli loyihani suratga olishga tayyorgarlik ko‘rish uchun kelgandi. Zinichev bilan birga rejissor ham halok bo‘lgan.
Izoh (0)