Jurnalist Jamol Qoshiqchini o‘ldirishda gumonlangan shaxslardan biri Parijda qo‘lga olindi

Washington Post jurnalisti Jamol Qoshiqchining o‘ldirilishida gumon qilingan shaxslardan biri Fransiyada qo‘lga olindi. Bu haqda Meduza xabar berdi.

RTL ma’lumotlariga ko‘ra, Saudiya Arabistoni fuqarosi bo‘lgan 33 yoshli Xolid Ayid al-Otaybiy 7-dekabr kuni Parijning Sharl de Goll aeroportida chegara nazoratidan o‘tish chog‘ida to‘xtatilgan.

U Ar-Riyodga uchib ketmoqchi edi, biroq uning ismi Turkiyada chiqarilgan xalqaro hibsga olish orderiga muvofiq Interpol qidiruvi bazasiga kiritilgani ma’lum bo‘ldi. Anqarada al-Otaybiy Saudiya qirollik gvardiyasining Qoshiqchini o‘ldirishida ishtirok etgan 20 ta maxsus kuchlaridan biri bo‘lgan, deb hisoblanadi.

Hibsga olingan shaxs Turkiyaga ekstraditsiya qilinishi mumkin.

Saudiya Arabistonining Fransiyadagi elchixonasi Xolid Ayid al-Otaybiyning jurnalistni o‘ldirishga aloqasi yo‘qligini ma’lum qildi va uni zudlik bilan ozod etishni talab qildi.

Eslatib o‘tamiz, Jamol Qoshiqchi The Washington Post jurnalisti bo‘lgan va o‘z maqolalarida Saudiya Arabistoni hukumatini tanqid qilgan. U 2018-yilning oktabr oyida Saudiya Arabistonining Istanbuldagi elchixonasida boshi tanasidan judo qilinib o‘ldirilgan. Uning jasadi hozirgacha topilmagan.

Turkiya hukumati, AQSh Senati va Markaziy razvedka boshqarmasi jurnalistni o‘ldirish haqidagi buyruqni Saudiya Arabistonining merosxo‘r shahzodasi Muhammad ibn Salmon berganligini ma’lum qilgan. Saudiya Arabistoni hukumati esa jurnalistning o‘limini kuch tuzilmalarining shaxsiy tashabbusi deb atagan.

Jinoyatda gumonlanganlar Saudiya Arabistoni sudiga topshirilgan. 2019-yilning dekabr oyida ularning besh nafari o‘lim jazosiga hukm qilingan, yana uch nafariga tayinlangan qamoq jazosining umumiy muddati 24 yilni tashkil etgan.

2020-yilning sentabrida besh kishiga tayinlangan o‘lim jazosi jurnalistning o‘g‘illari so‘roviga asosan qamoq jazosiga almashtirilgan. 2020-yilning may oyida jurnalistning o‘g‘illari otasining o‘limida aybdor bo‘lganlarni kechirishini ma’lum qilgan. Biroq jurnalistning do‘sti Qoshiqchining o‘g‘illari aybdorlarni kechirish haqida o‘z ixtiyori bilan ma’lum qilganiga shubha bildirgan.