Qozog‘iston parlamenti respublika Jinoyat kodeksidan o‘lim jazosini chiqarib tashlashni taklif qilmoqda. Majlis (quyi palata) Jinoyat kodeksiga ushbu masala bo‘yicha o‘zgartirish va qo‘shimchalar kiritish to‘g‘risidagi qonun loyihasini ma’qullagan, deb yozadi “Kommersant”.
“Davlat rahbari joriy yilning 16-noyabr kuni Jamoatchilik ishonchi milliy kengashi yig‘ilishida Qozog‘istonda o‘lim jazosini hech qanday shartlarsiz bekor qilish kerakligini aytgandi. Shu munosabat bilan kengash o‘lim jazosini jinoyat qonunchiligidan chiqarib tashlash bo‘yicha tegishli tuzatishlar tayyorladi”, — deyiladi Majlisning Qonunchilik va sud-huquq islohotlari kengashi xulosasida.
Qonunchilarning fikricha, Qozog‘istonda o‘lim jazosining bekor qilinishi milliy qonunchilikni yanada uyg‘unlashtirishga yordam beradi, shuningdek, eng oliy konstitutsiyaviy qadriyat – yashash huquqini ta’minlash imkonini beradi.
Qozog‘istonda amaldagi Jinoyat kodeksining 17 ta moddasida o‘lim jazosi ko‘zda tutilgan, biroq 2003-yildan buyon uni qo‘llashga moratoriy kiritilgan.
13-oktabr kuni Qozog‘iston Majilisi o‘lim jazosi bilan jazolash bo‘yicha Jinoyat kodeksiga o‘zgartirish va qo‘shimchalar kiritish to‘g‘risidagi qonun loyihasini birinchi o‘qishda ma’qullagan edi. Tuzatishlar 13 ta moddadan o‘lim jazosini chiqarib tashlash va uni faqat harbiy xarakterdagi o‘ta og‘ir jinoyatlar uchun qoldirishni taklif qiladi. Xususan, agressiv urushni boshlash va olib borish, ommaviy qirg‘in qurollarini qo‘llash, harbiy asirlarni va tinch aholini qatl etish bo‘yicha urush qonunlari va odatlarini buzish, shuningdek, urush paytida sodir etilgan genotsid uchun o‘lim jazosini saqlab qolish taklif qilingan.
Ammo mamlakat prezidenti Qosim-Jo‘mart To‘qayev parlamentga har qanday holatda ham o‘lim jazosini bekor qiladigan qonun tayyorlash taklifi bilan chiqdi.
Ma’lumot uchun, 2021-yil holatida butun dunyoda faqat 53 ta davlat o‘lim jazosini qo‘llamoqda. O‘zbekistonda o‘lim jazosi 2008-yil 1-yanvardan boshlab bekor qilingan.
Izoh (0)