Моуриньога ишонч билдираётган «Рома», «Тоттенҳэм»да коронавирус ўчоғи ва норматив тестдан ўтадиган Суперлига футболчилари. Энг сўнгги спорт янгиликлари

Дунё ва ўзбек спортига оид 7 декабрнинг энг муҳим хабарлари дайжести билан танишинг.

Ўзбекистон

ЎФА Мураббийлар кенгаши 6 ноябрь куни йиғилиш ўтказди. Унда Суперлига футболчиларининг мавсум бошланишидан олдин жисмоний тайёргарлиги масаласида тестларини жорий этиш, чемпионат клубларида машғулотлар жараёнини бошқаришда инновацион технологиялардан фойдаланиш масалалари муҳокама қилинди.

«Замонавий технологияларга таянган ҳолда, Ўзбекистоннинг иқлимига мос келадиган жисмоний тайёргарлик тест синовлари учун дастур ишлаб чиқилади. Ушбу дастур 3 йилга мўлжалланган бўлиб, ҳар бир футболчининг жисмоний кўрсаткичларини босқичма босқич ўсишига хизмат қилади», — деган Равшан Эрматов.

Бу жараён, ўз навбатида, футболчиларга масъулият юклаши, бунинг натижасида улар машғулот ва ўйинларда борини бериб ҳаракат қилишлари мумкинлиги қайд этилди.

Эртага бокс бўйича катталар ўртасида Ўзбекистон чемпионати старт олади

Тошкентдаги «Универсал» спорт мажмуасида бокс бўйича катталар ўртасидаги Ўзбекистон чемпионати 8—14 декабрь кунлари бўлиб ўтади.

Унда мамлакатнинг турли ҳудудларидан бўлган 500 нафарга яқин боксчилар иштирок этади. Эркаклар ўртасида 13 та, аёллар иштирокида эса 11 та вазн тоифасида жанглар бўлиб ўтади. Иштирокчилар қаторида Олимпия ўйинлари қатнашчилари, Жаҳон ва Осиё чемпионати совриндорларини ҳам кўриш мумкинлиги айтилмоқда.

Ўзбекистон Суперлигасининг 2022 йилги мавсуми бошланиш санаси маълум бўлди

Суперлиганинг янги мавсуми эса 2 март куни старт олади. Чемпионатда 14 та жамоа иштирок этади. Бу ҳақда ПФЛ матбуот хизмати маълум қилди.

Ўзбекистон Суперкубоги баҳси 26 февраль санасида бўлиб ўтади. Унда чемпион сифатида «Пахтакор» ва Кубок соҳиби сифатида «Насаф» ўзаро кураш олиб боради.

Жаҳон

«Тоттенҳэм» клубида коронавирус ўчоғи пайдо бўлгани айтилмоқда. The Athletic нашрининг хабар қилишича, «шпорлар»нинг 6 нафар футболчиси ва икки нафар мураббийлар штаби вакилида вирус аниқланган. Касалланган ҳақидаги маълумотлар очиқланмаган.

Эндиликда улар 10 кун мобайнида изоляцияда бўлади. Шу тариқа зарарланган футболчилар Лондон клубининг яқин орадаги учта ўйинини ўтказиб юборади.

«Порту» клуби сардори Пепеда ҳам коронавирус аниқланган. Футболчи Чемпионлар Лигаси 6-тури доирасидаги «Атлетико»га қарши ўйинни ўтказиб юборади.

Аввалроқ COVID билан боғлиқ вазият сабаб «Бавария» ва «Барселона» жамоалари ўртасидаги учрашув томошабинларсиз ўтказилиши хабар қилинганди.

Жозе Моуриньо «Рома»дан кетмайди

Римликлар клубининг қониқарсиз натижаларига қарамасдан, жамоа раҳбарияти Жозе Моуриньони истеъфога чиқариш ниятида эмас.

Журналист Фабрисио Романога кўра, «Рома» хўжайинлари ва раҳбарияти португалиялик мутахассисга тўлиқ ишонмоқда. Унинг Рим клубидаги келажаги хавф остида эмас.

«Рома» январь ойида таркибни кучайтирмоқчи. Айни вақтда жамоа А Серия 16-туридан кейин 25 очко билан 8-ўринда бормоқда.

Мутахассиснинг «бўрилар» билан амалдаги келишуви 2024 йилнинг ёзига қадар мўлжалланган.

«Барселона» Торрес учун 45 млн тўламоқчи, «Манчестер Сити» эса 60 миллион сўрамоқда

«Барселона» ва «Манчестер Сити» ярим ҳимоячи Ферран Торрес трансфери борасида музокараларни давом эттирмоқда.

Mundo Deportivo ўз манбаларига таяниб хабар қилишича, каталон клуби инглизлар билан келишувга эришишга яқин. «Манчестер Сити» футболчи учун 60 миллион евро сўрамоқда. «Барселона» эса 45 миллион евро тўлашга тайёр.

Каталонлар клуби ва Торреснинг ўзи «шаҳарликлар» билан келишув амалга ошишига ишонмоқда. Ферран аллақачон «Барселона» билан 5 йиллик шартнома борасида келишиб қўйган. Футболчи «Манчестер Сити»дан нархни туширишни ва уни Ла Лигага қўйиб юборишни сўрашга тайёр.