Braziliyaning San-Paulu shahrida ikki nafar chaqaloq bo‘g‘ma, qoqshol, ko‘kyo‘tal va gepatit B’ga qarshi buyurilgan kombinatsiyalangan vaksinani olish o‘rniga xatolik sabab COVID-19 ga qarshi Pfizer vaksinasi bilan emlandi. Bu haqda mahalliy Uol portaliga tayanib, “RBK” xabar berdi.
Vaksinatsiyadan so‘ng, ikki oylik qizcha va to‘rt oylik bola zudlik bilan kuchli reaksiya tufayli shifoxonaga yotqizilgan. Yangi tug‘ilgan chaqaloqlarning tana harorati ko‘tarilib ketgan, qizcha qayt qila boshlagan.
Vaksina yaratuvchilar bolalarni bir haftaga shifoxonaga yotqizishni maslahat bergan. Har ikki sutka davomida ulardan qon tahlili olinishi, elektro va kardiogramma qilinishi kerak.
Portal ma’lumotlariga ko‘ra, vaksinalarni adashtirib yuborgan hamshira vaqtincha ishdan chetlatilgan, holat bo‘yicha ma’muriy surishtiruv boshlangan.
Avvalroq Vyetnamda tibbiyot xodimlari xatolik sabab 2—6 oy oralig‘idagi 18 nafar chaqaloqni koronavirusga qarshi vaksina bilan emlagandi. Bolalarning ayrimlarida tana harorati ko‘tarilishi, qizarish va inyeksiya joyida shish paydo bo‘lishi kuzatilgan. Ma’lumotlarga ko‘ra, bolalarning ahvoli barqaror deya baholangan, ular nazorat ostida qolgan, rasmiylar tergov boshlagan.
Mavzuga doir: Braziliya Konstitutsion sudi kompaniyalarga COVID-19 ga qarshi emlanmaganlarni ishdan bo‘shatishga ruxsat berdi
Izoh (0)