Turkmanistonda 3-dekabr kuni prezident Gurbanguli Berdimuhamedov raisligida hukumat a’zolarining joriy yildagi 11 oylik faoliyati yakunlariga bag‘ishlangan yig‘ilishi bo‘lib o‘tdi. Bu haqda Turkmaniston davlat axborot agentligiga tayanib, “Xronika Turkmenistana” xabar berdi.
Qurilish, sanoat va energetika komplekslari bo‘yicha bosh vazir o‘rinbosari Chorimurat Purchekov “Turkmenhimiya” (Turkmankimyo) davlat konserni va Ashxobod ma’muriyatining (Purchekov poytaxtga mas’ul – “XT”) ishi haqida hisobot berdi.
Purchekov soha yutuqlari haqida ham gapirdi, unga ko‘ra, ishlab chiqarish va qurilish bo‘yicha reja ortig‘i bilan bajarilgan, belgilanganidan ortiq elektr energiyasi ishlab chiqarilgan va eksport qilingan, Ashxobod shahar hokimligi bajarilgan ishlar va ko‘rsatilgan xizmatlar bo‘yicha o‘z majburiyatlarini ortig‘i bilan bajargan.
Biroq Turkmaniston rahbari Purchekovning faoliyatidan norozi ekanini bildirdi. Berdimuhamedovning ta’kidlashicha, obyektlar qurilishi juda sust kechmoqda, kelgusi yil uchun qurilish loyihalarini ko‘paytirish rejalashtirilgandi.
Shu munosabat bilan bosh vazir o‘rinbosariga qurilish sohasida zudlik bilan islohotlarni amalga oshirish, qurilish materiallari ishlab chiqarishni ko‘paytirish, yangi ish o‘rinlari yaratish, ishlab chiqarishga raqamli tizimlarni joriy etish, shuningdek, eng yangi asbob-uskunalar va innovatsion texnologiyalar bilan jihozlangan yuqori samarali qurilish-texnologik kompaniyalar va firmalarni tashkil eta oladigan tadbirkorlar bilan ishlash topshirildi.
Bundan tashqari, Berdimuhamedov bosh vazir o‘rinbosariga “mavjud qiyinchiliklarga qaramay” mamlakat ichida energiya halqasini yaratish va Turkmaniston—Afg‘oniston—Pokiston (TAP) elektr uzatish liniyasini qurish bo‘yicha ishlarni davom ettirishni buyurdi. Turkmaniston davlat axborot agentligi aynan qanday qiyinchiliklar haqida gap ketayotganiga aniqlik kiritmagan. Berdimuhamedov TAP liniyalari o‘tadigan qo‘shni Afg‘onistondagi og‘ir vaziyatga ishora qilgan bo‘lishi mumkin, deb yozadi “Xronika Turkmenistana”.
Berdimuhamedov Purchekovning asosiy vazifasi qurilishga sarmoya qiluvchilarni faol qidirish deb atadi.
Xabarga ko‘ra, ma’ruza yakunida Turkmaniston prezidenti bosh vazir o‘rinbosariga “xizmat vazifalarini zarur darajada bajarmagani, ishda yo‘l qo‘ygan kamchiliklari uchun” qattiq tanbeh berdi.
Noyabr oyida Vazirlar Mahkamasining 2021-yildagi o‘n oylik faoliyati yakunlariga bag‘ishlangan majlisda Berdimuhamedov “Turkmankimyo” rahbari va bosh prokurorga faoliyatidagi sustkashliklar uchun qattiq tanbeh bergandi.
Izoh (0)