Germaniya hukumati veb-saytida Angela Merkelning kansler vazifasini bajaruvchi sifatida so‘nggi bor yo‘llagan haftalik videomurojaati e’lon qilindi. Bu haqda Meduza xabar berdi.
Merkelning aytishicha, u Germaniya hukumatidagi 15 yillik boshqaruvi davomida turli mavzularda 600 dan ortiq videomurojaatlar yo‘llagan. O‘zining so‘nggi murojaatida u Germaniya aholisini koronavirusga qarshi faol emlanishga chaqirdi.
“Vaksina oling! Birinchi marta emlanasizmi yoki buster doza olasizmi, farqi yo‘q”, — deya Merkel istalgan vaksina yordam berishini ta’kidladi. U emlanish hech bo‘lmaganda koronavirusdan o‘lishning oldini olishini aytdi. Merkelning so‘zlariga ko‘ra, xavfliroq deya taxmin qilinayotgan yangi “omikron” shtammi Germaniyada ham aniqlangan vaziyatda emlanish ayniqsa muhimdir. Merkel vaksinatsiyaning maksimal darajasi mamlakatda pandemiyani yengishga yordam berishini ta’kidladi.
“Afsuski, oldimizda hali bir necha og‘ir haftalar turibdi, ularni faqat birgalikdagi sa’y-harakatlar bilan yengib o‘tishimiz mumkin”, — dedi kansler vazifasini bajaruvchi.
Oktabr oyidan beri Germaniyada koronavirusning yangi to‘lqini davom etmoqda. Uning oqibatida kasallanishlar soni bo‘yicha yangi antirekordlar qayd etilmoqda. Ammo mamlakatda infeksiya qurbonlari soni bir yil oldingiga qaraganda ancha kam.
Angela Merkel uch yil avval 2021-yilda Germaniya kansleri lavozimini tark etishini e’lon qilgan edi. Sentabr oyida mamlakatda saylovlar bo‘lib o‘tdi, uning natijasida yangi hukumat koalitsiyasi tuzildi.
Kansler sifatida Merkelning o‘rnini Germaniyaning amaldagi moliya vaziri Olaf Shols egallaydi. Parlamentda u 8-dekabr kuni rasman ish boshlaydi.
2-dekabr kuni Berlinda Angela Merkelning Germaniya kansleri lavozimidan ketishi munosabati bilan tantanali marosim bo‘lib o‘tgan edi.
Mavzuga doir:
Izoh (0)