Jo Bayden administratsiyasi 2022-yili Pekinda o‘tkaziladigan Olimpiada o‘yinlariga diplomatik boykot e’lon qiladi. Bu haqda CNN telekanaliga tayanib, “Kommersant” xabar berdi. Ta’kidlanishicha, boykot sportchilarga taalluqli bo‘lmaydi.
Telekanal ma’lumotlariga ko‘ra, Milliy xavfsizlik kengashi bayonotni “shaxsiy tartibda” muhokama qilgan. Uning vakillari ushbu ma’lumotga izoh berishdan bosh tortgan. Diplomatik boykot rasmiy shaxslarning Olimpiada o‘yinlariga bormasligini bildiradi.
Eslatib o‘tamiz, 16-noyabr kuni Washington Post gazetasi bir nechta manbalarga tayanib, Bayden ma’muriyati yaqin orada 2022-yilgi Pekin Olimpiadasiga diplomatik boykot e’lon qilmoqchiligi haqida xabar bergandi. Bu prezidentning, AQSh hukumatining boshqa birorta amaldori Pekindagi Olimpiada o‘yinlarida ishtirok etmasligini anglatadi. Ma’muriyat manbalariga ko‘ra, Bayden mazkur qarorni oy oxirigacha tasdiqlashi kutilayotgan edi. Keyinroq AQSh prezidenti Jo Bayden AQSh Xitoy bilan ziddiyatiga qaramay Pekin Olimpiadasiga delegatsiya yuborishi yoki yo‘qligi haqida jurnalistlarning savoliga javob bergan. “Men delegatsiyaman va men buni hal qilganman (I’m the delegation and I dealt with it)”, — degan Bayden. U o‘z bayonotining ma’nosini tushuntirmagan.
Pekin va Vashington o‘rtasidagi munosabatlarning so‘nggi keskinlashuvi Xitoy qo‘shinlarining Tayvan bo‘g‘ozidagi faolligi ortgani bilan bog‘liq. Oktabr oyi boshida Tayvan Mudofaa vazirligi Xitoy samolyotlari tomonidan chegarani kesib o‘tish holatlari rekord darajada qayd etilgani haqida xabar bergan. Shundan so‘ng, Bayden Xitoy tomonidan tajovuz sodir bo‘lgan taqdirda Qo‘shma Shtatlar Tayvanni qo‘llab-quvvatlashga tayyormi yoki yo‘qmi, degan savolga ijobiy javob bergan, biroq u “yagona Xitoy” tamoyilini qo‘llab-quvvatlashini ham aytgan.
Izoh (0)