Twitter bosh direktori Jek Dorsi o‘z lavozimidan ketdi. Bu haqda u o‘zining mikroblogi orqali e’lon qildi, deb xabar beradi Meduza.
Dorsining o‘rniga kompaniya rahbari etib Twitter texnik direktori Parag Agraval tayinlanadi. Dorsining so‘zlariga ko‘ra, u o‘z vakolatlari tugagunga qadar direktorlar kengashi a’zosi sifatida ishlashni davom ettiradi, keyin esa kompaniyadan butunlay ketadi.
Dorsi o‘zining qarorini asoschi juda uzoq vaqt kompaniyani boshqarsa, bu oxir-oqibat uning faoliyatini cheklashga olib kelishi bilan izohlagan.
Dorsining ketishi rasman e’lon qilinishidan taxminan bir soat oldin yangilik OAVlarda tarqaldi. Bu Twitter kotirovkalarining 10 foizga o‘sishiga olib keldi, biroq keyin aksiyalar oldingi savdolar yakundagi darajaga qaytgan.
Dorsi Twitter ijtimoiy tarmog‘iga 2006-yili Evan Uilyams va Biz Stoun bilan birga asos solgan. Dorsi 2008-yilga qadar bosh direktor lavozimida ishlagan, shundan so‘ng direktorlar kengashi raisi lavozimiga o‘tgan. 2015-yilda yana bosh direktorga aylangan.
Shuningdek, Dorsi Square to‘lov servisining bosh direktori hisoblanadi. 2020-yilda Twitter investorlari Dorsi Square’ga juda ko‘p vaqt sarflayotgani sabab undan kompaniya rahbarligidan ketishni talab qilgan. Hozirda Dorsining boyligi 11,7 milliard dollarga baholanadi.
Avvalroq Jek Dorsining tarixdagi birinchi Twitter posti 2,9 mln dollarga sotilgani, Twitter’da siyosiy reklama to‘liq man etilishi ma’lum qilingani to‘g‘risida xabar berilgandi.
Izoh (0)