“G‘arb Rossiya va Ukraina o‘rtasida nizo chiqadigan bo‘lsa Belarus armiyasini ushlab turish uchun muhojirlardan foydalanmoqchi” — Lukashenko

Belarus prezidenti Aleksandr Lukashenkoning fikricha, G‘arb Rossiya Federatsiyasi va Ukraina o‘rtasida ziddiyat yuzaga kelgan taqdirda Belarus armiyasini ushlab turish uchun muhojirlardan foydalanmoqchi.

“Ular juda yaxshi tushunadi: agar Ukraina Rossiya bilan ziddiyatga kirishmoqchi bo‘lsa, Belarus chetda qolmaydi, shuning uchun Belarus armiyasi g‘arbiy chegaralarda ushlab turilishi kerak”, — deya ta’kidladi Lukashenko 29-noyabr kuni respublika Mudofaa vazirligining harbiy xavfsizlik masalasiga bag‘ishlangan yig‘ilishda.

“Ehtimol (G‘arb) bizda muhojirlar oqimi kamayib borayotganidan xavotirlanayotgandir, chunki ular bu odamlardan o‘z ichki muammolarini hal qilish va bizni sarosimada ushlab turish uchun foydalangan”, — deya prezident so‘zlaridan iqtibos keltirgan “BelTA” axborot agentligi.

Yaqin orada uning so‘zlarini G‘arb o‘z xatti-harakatlari bilan tasdiqlashiga Lukashenkoning ishonchi komil.

Lukashenko bundan avval ham Mudofaa vaziri va Davlat chegara qo‘mitasi raisiga provokatsiyalarga berilmaslik, hech qanday tarzda mojaro va to‘qnashuvlarni keltirib chiqarmaslik to‘g‘risida ko‘rsatma berganini esladi. Shu bilan birga u Mudofaa vaziri va Qurolli Kuchlar Bosh shtab boshlig‘iga Belarusga qarshi ehtimoliy tajovuz va noqonuniy harakatlarga javob rejasini tayyorlashni topshirgan edi.

G‘arb Donbassda yoki Rossiya Federatsiyasi bilan chegaradagi biror joyda yana nizo chiqadigan bo‘lsa, Minsk chetda qolmasligini tushunadi, dedi Lukashenko.

“Ular juda yaxshi biladi: agar  Donbassda yoki Rossiya bilan chegaradagi biror joyda urush boshlansa, Belarus chetda qolmaydi. Belarus kim tomonida bo‘lishi aniq”, — dedi Lukashenko. Uning so‘zlariga ko‘ra, G‘arb buni tushungani uchun o‘zining shimoliy, Belarus—Ukraina chegarasini mustahkamlashni boshlagan, vaholanki buning uchun hech qanday dalil yoki sabab yo‘q. Shunga qaramay, ular u yerda harbiy kontingentini to‘plamoqda va bu haqda ochiqdan ochiq jar solmoqda. Bu hozirgi bosqichda 8 mingga yaqin, dedi Belarus rahbari.

Avvalroq Lukashenko Yevroittifoqdan 2 ming muhojir uchun gumanitar yo‘lak ochishni so‘ragani xabar qilingandi.Yevroittifoq Lukashenko bilan muzokaralar o‘tkazish niyatida emasligini bildirgan.