Shvetsiya bir palatali parlamenti (Riksdag) Shvetsiya Sotsial-demokratik ishchi partiyasi rahbari Magdalena Anderssonni yana bosh vazir etib sayladi. Siyosatchi bir haftadan kamroq vaqt ichida ikkinchi marta ushbu lavozimni egalladi. O‘tgan safar u saylanganidan so‘ng 7 soat o‘tib iste’foga chiqqandi. Andersson xonim — Shvetsiya hukumatini boshqaradigan birinchi ayol.
Anderssonning nomzodini tasdiqlash uchun kamida 175 kishi unga xayrixoh ovoz berishi yoki betaraf qolishi kerak edi. Uning nomzodini 101 deputat qo‘llab-quvvatladi, 173 kishi qarshi ovoz berdi, yana 75 deputat betaraf qoldi.
Magdalena Andersson ilk bor 24-noyabr kuni bosh vazir etib saylangan edi, biroq u Yashillar partiyasining hukumatdan chiqish to‘g‘risidagi qarori ortidan Vazirlar Mahkamasida bo‘linish yuz bergani tufayli yetti soatdan keyin o‘z lavozimini tark etgan. Yashillar Shvetsiya hukumatining budjet loyihasi ozchilik hukumatdan emas, balki muxolif partiyalardan tasdiqlangani munosabati bilan hukmron koalitsiyadan chiqqan.
Eslatib o‘tamiz, Anderrson 10-noyabr kuni Shvetsiya bosh vaziri lavozimidan ozod etilgan Stefan Lyovenning o‘rnini egallagan edi. Lyoven 2012-yildan 2021-yilgacha Shvetsiya Sotsial-demokratik partiyasi rahbari bo‘lgan. Uning qo‘l ostida partiya 2014- va 2018-yillardagi ikkita saylovda g‘alaba qozongan. Biroq so‘nggi paytlarda partiyaning pozitsiyasi tushib ketdi, bu Shvetsiya fuqarolari o‘rtasida o‘tkazilgan so‘rov natijalarida ham o‘z aksini topdi. Avgust oyida bosh vazir 2022-yilgi saylovlar oldidan partiyaga yangi rahbar kerakligini aytgan.
Magdalena Andersson 2014-yilda Shvetsiya moliya vaziri lavozimini egallab, hukumatda mazkur vazifa yuklatilgan birinchi ayol bo‘lgan.
Mavzuga doir:
- Shvetsiya bosh vaziri iste’foga chiqdi. Uning o‘rnini ayol kishi egallashi mumkin
- Shvetsiya hukumati rahbarligi Magdalena Anderssonga topshiriladi. U mamlakat tarixida bosh vazir lavozimini egallaydigan birinchi ayol
- Shvetsiyaning birinchi ayol bosh vaziri lavozimiga saylanganidan 7 soat o‘tib iste’foga chiqdi
Izoh (0)