Twitter rahbari Jek Dorsi 13 ta tvitdan iborat izoh yozib, unda AQShning amaldagi prezidenti Donald Trampning akkaunti bloklanishi haqida fikr bildirdi, deb xabar bermoqda Meduza.

Foto: Global Look Press

Dorsining ta’kidlashicha, Trampning akkaunti bloklanishi to‘g‘ri qaror bo‘ldi. Ijtimoiy tarmoq buni o‘z kuchini jamoat xavfsizligiga qaratishga majbur qilgan favqulodda vaziyatda qabul qildi. “Onlayn aytilgan gapning oflaynda keltirib chiqaruvchi zarari yaqqol namoyon”, — degan Dorsi.

Shu bilan birga, uning fikricha, bunday harakatlar jamiyatni ikkiga bo‘lib yuboradi. Shuningdek, korporatsiya va alohida shaxslar global jamoat munozarasi ustidan qanchalik egalik qilishi haqida o‘ylashga majbur qiladigan xavfli vaziyatni yuzaga keltiradi.

Dorsi, shuningdek, bir vaqtning o‘zida bir nechta yirik ijtimoiy tarmoqlarning Trampni bloklash qarori oldindan kelishilmaganini bildirgan. “Katta ehtimol bilan, kompaniyalar o‘z xulosalaridan kelib chiqdi yoki boshqalarning harakatlaridan ilhomlandi”, — degan Dorsi.

Twitter rahbari Trampning akkauntini bloklashdan xursand emasligini, buni “sog‘lom muloqot madaniyatini targ‘ib qilishdagi muvaffaqiyatsizligimiz  belgisi ekanligidan dalolat” deb bildi.

Eslatib o‘tamiz, AQShda 3-noyabr kuni bo‘lib o‘tgan prezident saylovlari natijalarini saylovchilar hay’ati 15-dekabr kuni qo‘llab-quvvatlab, demokratlardan nomzod Jo Baydenni g‘olib deb e’lon qildi. Kongress yakunlarni 6-yanvar kuni tasdiqlashi kerak edi. Bunga saylovda mag‘lub bo‘lgan prezident Donald Trampning tarafdorlari xalaqit berdi: ular Kongress binosi yonida yig‘ilib, ichkariga bostirib kirdi. Politsiya ularni faqat kuch bilan quvib chiqara oldi.

Kongressmenlarning bir qismi Kapitoliydan evakuatsiya qilindi. Vashingtonda komendantlik soati e’lon qilinib, tartibni saqlash uchun AQSh poytaxtiga Milliy gvardiya kuchlari kiritildi. To‘qnashuvlarda to‘rt kishi halok bo‘lgani aytilmoqda.

Shundan so‘ng Facebook va Instagram Trampni 24 soatga, Twitter esa 12 soatga bloklab qo‘ydi. Keyinroq Facebook va Instagram ham Donald Tramp akkauntini prezidentlik muddati tugaguncha blokladi.