Twitter бош директори Жек Дорси ўз лавозимидан кетди. Бу ҳақда у ўзининг микроблоги орқали эълон қилди, деб хабар беради Meduza.
Дорсининг ўрнига компания раҳбари этиб Twitter техник директори Параг Агравал тайинланади. Дорсининг сўзларига кўра, у ўз ваколатлари тугагунга қадар директорлар кенгаши аъзоси сифатида ишлашни давом эттиради, кейин эса компаниядан бутунлай кетади.
Дорси ўзининг қарорини асосчи жуда узоқ вақт компанияни бошқарса, бу охир-оқибат унинг фаолиятини чеклашга олиб келиши билан изоҳлаган.
Дорсининг кетиши расман эълон қилинишидан тахминан бир соат олдин янгилик ОАВларда тарқалди. Бу Twitter котировкаларининг 10 фоизга ўсишига олиб келди, бироқ кейин акциялар олдинги савдолар якундаги даражага қайтган.
Дорси Twitter ижтимоий тармоғига 2006 йили Эван Уильямс ва Биз Стоун билан бирга асос солган. Дорси 2008 йилга қадар бош директор лавозимида ишлаган, шундан сўнг директорлар кенгаши раиси лавозимига ўтган. 2015 йилда яна бош директорга айланган.
Шунингдек, Дорси Square тўлов сервисининг бош директори ҳисобланади. 2020 йилда Twitter инвесторлари Дорси Square’га жуда кўп вақт сарфлаётгани сабаб ундан компания раҳбарлигидан кетишни талаб қилган. Ҳозирда Дорсининг бойлиги 11,7 миллиард долларга баҳоланади.
Аввалроқ Жек Дорсининг тарихдаги биринчи Twitter пости 2,9 млн долларга сотилгани, Twitter’да сиёсий реклама тўлиқ ман этилиши маълум қилингани тўғрисида хабар берилганди.
Изоҳ (0)