Avstraliya bosh vaziri Skott Morrison hukumati joriy haftada mahalliy sudlarga ijtimoiy tarmoqlardan internet-trollarning shaxsini oshkor qilishni talab etish huquqini beruvchi qonun loyihasini taqdim etadi. Bu haqda bosh vazir 28-noyabr kuni ma’lum qilgan, deb yozadi “Kommersant”.
Avstraliya rasmiylarining fikricha, bunday chora avstraliyaliklarni Facebook, Twitter va boshqalar shu kabi internet platformalarida tajovuz va tuhmatlardan samaraliroq himoyalaydi.
“Ijtimoiy tarmoqlar ko‘pincha anonimlikdan foydalanib, odamlarni ta’qib qiladigan, o‘zini agressiv tutadigan va oqibatini o‘ylamay hayotni barbod qiladigan qo‘rqoqlar uchun boshpanaga aylanishi mumkin”, — dedi Morrison. “Biz maktablarda, uyda, ofislarda yoki ko‘chada anonim hujumlarga jim qarab turmaymiz. Shuningdek, na onlayn, na gadjetlarimizda ham ularga toqat qilmasligimiz kerak. Ijtimoiy tarmoqlarni odamlar obro‘si va hayotini barbod qiladigan anonim trollar bosishiga ruxsat bera olmaymiz. Bunga chek qo‘yish lozim”.
Avval jamoatchilik muhokamasiga, keyin esa parlamentga yuboriladigan ushbu qonun loyihasiga muvofiq, hukumat anonim internet-trollarga qarshi kurashishning quyidagi mexanizmini taklif qilmoqda: Ta’qib yoki haqoratga uchragan ijtimoiy tarmoq foydalanuvchilari ushbu tarmoq ma’muriyatiga anonim profillar qoldirgan izohlarni, shu jumladan foydalanuvchining o‘ziga tegishli kontentni o‘chirish talabi bilan shikoyat qilishi mumkin. Agar ijtimoiy tarmoq bunday kontentni olib tashlamasa, foydalanuvchi sudga murojaat qilish huquqiga ega, bu esa ijtimoiy tarmoqdan anonim izoh egasining shaxsini oshkor qilishni talab etadi.
Izoh (0)