Gollivud yulduzi Dueyn Jonson urush qatnashchisiga o‘z mashinasini berib yubordi. Erkak kutilmagan sovg‘adan shokka tushdi

Gollivud yulduzi Dueyn Jonson Instagram sahifasida ta’sirli video bilan bo‘lishdi. Yangi “Qizil xabarnoma” (Red notice ) filmining muxlislarini bir yerga jamlab, ular bilan uchrashgan aktyor nutqi davomida Oskar Rodrigez ismli urush qatnashchisini sahnaga chorlagan.

Dueyn 75 yashar onasiga g‘amxo‘rlik qiladigan, shaxsiy sport murabbiyi bo‘lib ishlab, zo‘ravonlikdan aziyat chekkan ayollarga yordam beradigan hamda o‘z cherkovida yetakchi bo‘lgan Rodrigezning hikoyasidan o‘ta ta’sirlanganini ta’kidlagan. Eng qizig‘i uchrashuvdan keyin sodir bo‘lgan. Chiqishda Oskarni kutib olgan Jonson uni o‘rindig‘iga xat tashlab qo‘yilgan mashinasining oldiga olib borgan. Maktubda mashina endi Rodrigezga tegishli ekani aytilgan.

https://www.instagram.com/p/CWrA-w5hj7R/?utm_source=ig_embed&utm_campaign=embed_video_watch_again

Odamlarga qilgan yaxshiliklari uchun Oskarga minnatdorlik bildirgan aktyor u va uning oilasini Rojdestvo bilan tabriklagan. Kutilmagan yangilikdan shokka tushib qolgan erkak Jonsonni quchoqlab olgan. Ko‘zlariga ishonmagan Oskar tashakkurini izhor qila boshlagan. Aktyor avvaliga filmdagi Porsche Taycan’ni sovg‘a qilmoqchi bo‘lgani, ammo kompaniyadan rad javobini olgach, o‘z mashinasini berib yuborishga qaror qilganini ta’kidlagan. Video so‘ngida aktyor: “Endi faqat uyga qanday yetib borishni o‘ylash qoldi, xolos”, — deb hazillashgan.