Gollivud yulduzi Dueyn Jonson o‘zini musiqa yo‘nalishida ham sinab ko‘rishga qaror qildi. U taniqli mustaqil reper Tech N9ne’ning Face Off nomli qo‘shig‘i va klipining mehmoniga aylangan, deb xabar beradi “Film.ru”.
Foto: “Film.ru”
Ma’lum qilinishicha, mazkur kompozitsiya hozirda striming maydonchalarda mavjud bo‘lgan ASIN9NE albomidan o‘rin olgan. Jonson va Tech bir necha yil oldin HBO’ning “Futbolchilar” serialini suratga olish jarayonida tanishib qolgan. Keyinroq reper aktyor bilan Instagram orqali bog‘lanib, unga kollabratsiya taklif qilgan va Jonson rozi bo‘lgan.
Avvaliga Jonson shunchaki qo‘shiq uchun ayrim so‘zlarni aytishi kutilgandi, biroq Dueyn shaxsiy replikasini yozishni xohlagan. Bu Jonsonning musiqa yo‘nalishidagi birinchi ishi emas: 2016-yilda u Disney’ning “Moana” multfilmiga ovoz berishda ham ishtirok etgan.
Eslatib o‘tamiz, 2020-yilning sentabrida “Forsaj” filmlari orqali mashhurlikka erishgan amerikalik aktyor Vin Dizel “Feel Like I Do” nomli o‘zining birinchi qo‘shig‘ini taqdim etgandi.
