Голливуд юлдузи Дуэйн Жонсон уруш қатнашчисига ўз машинасини бериб юборди. Эркак кутилмаган совғадан шокка тушди

Голливуд юлдузи Дуэйн Жонсон Instagram саҳифасида таъсирли видео билан бўлишди. Янги «Қизил хабарнома» (Red notice) фильмининг мухлисларини бир ерга жамлаб, улар билан учрашган актёр нутқи давомида Оскар Родригез исмли уруш қатнашчисини саҳнага чорлаган.

Дуэйн 75 яшар онасига ғамхўрлик қиладиган, шахсий спорт мураббийи бўлиб ишлаб, зўравонликдан азият чеккан аёлларга ёрдам берадиган ҳамда ўз черковида етакчи бўлган Родригезнинг ҳикоясидан ўта таъсирланганини таъкидлаган. Энг қизиғи учрашувдан кейин содир бўлган. Чиқишда Оскарни кутиб олган Жонсон уни ўриндиғига хат ташлаб қўйилган машинасининг олдига олиб борган. Мактубда машина энди Родригезга тегишли экани айтилган.

https://www.instagram.com/p/CWrA-w5hj7R/?utm_source=ig_embed&utm_campaign=embed_video_watch_again

Одамларга қилган яхшиликлари учун Оскарга миннатдорлик билдирган актёр у ва унинг оиласини Рождество билан табриклаган. Кутилмаган янгиликдан шокка тушиб қолган эркак Жонсонни қучоқлаб олган. Кўзларига ишонмаган Оскар ташаккурини изҳор қила бошлаган. Актёр аввалига фильмдаги Porsche Taycan’ни совға қилмоқчи бўлгани, аммо компаниядан рад жавобини олгач, ўз машинасини бериб юборишга қарор қилганини таъкидлаган. Видео сўнгида актёр: «Энди фақат уйга қандай етиб боришни ўйлаш қолди, холос», — деб ҳазиллашган.