Asl ismi Jeyms Donaldson bo‘lgan amerikalik mashhur bloger MrBeast real hayotda “Kalmar o‘yini”ni tashkillashtirdi. Bu haqda Esquire xabar beradi.
Janubiy Koreyaning mashhur serialidagidek sinov aks etgan video blogerning YouTube-kanalida taqdim qilingan. Unda nafaqat sinovlar, balki dekoratsiyalar ham bir xil ekanini ko‘rish mumkin.
O‘yinda bir-biriga begona 456 nafar ishtirokchi qatnashgan. G‘olibga 45,6 milliard von (38,122,800 dollar) o‘rniga, 456 ming dollar sovrin berilgan. Shunga qaramay, ayrim shartlarda 10 ming dollargacha mablag‘ga erishish mumkin bo‘lgan. Qolaversa, serialdagidan farqli ravishda, ishtirokchilarning hayotiga hech qanday tahdid bo‘lmagan.
O‘qlar o‘rniga xavfsiz vositalardan foydalanilgan, yiqilishlar xavfsiz bo‘lishi uchun porolondan foydalanilgan, pichoqlar esa plastik bo‘lgan.MRBeast Twitter sahifasida maydon qurilishi aks etgan kadrlar bilan bo‘lishgan. U mazkur o‘yinni tashkillashtirish uchun 3,5 million dollar sarflagan. MrBeast’ning bu tashabbusidan hayratda qolgan ijtimoiy tarmoq foydalanuvchilari unga kino suratga olishni tavsiya qilgan.Ayrimlar ushbu loyiha uchun 40 kun ketganidan hayratda qolsa, boshqalar bloger uyushtirgan o‘yin-kulgi koreys serialida mujassam bo‘lgan ma’no — shafqatsizlikdan chalg‘itishi va bu ko‘proq “Truman tomoshasi” (The Truman show) filmining zamonaviy versiyasini eslatishini yozib qoldirgan.
Ma’lumot uchun, Netflix platformasida taqdim qilingan “Kalmar o‘yini” 2021-yilning eng mashhur loyihalaridan biri bo‘lgan. Kompaniyaga 900 million dollar daromad keltirgan loyihani 17 kun ichida (17-sentabrdan boshlab) 111 million kishi tomosha qilgan.
Izoh (0)