Eron prezidenti Ibrohim Raisiyining aytishicha, mamlakat o‘z kuch-qudratini dushmanlariga isbotlagan, hozir Eron farovonlik va taraqqiyot sari intilishda davom etishni rejalashtirmoqda. Bu haqda “Iran.ru” xabar berdi.
“Hukumat hayotining har bir kuni menda mamlakat taraqqiyotiga tobora ko‘proq umid uyg‘otmoqda, ishonchim komilki, turli masalalar bo‘yicha jiddiy qarorlar qabul qilinadi va bugun dushmanlar Eron kuchli pozitsiyada ekanini yaxshi biladi”, — dedi Raisiy Erondagi “Basij” (ko‘ngilli kuchlar) a’zolariga murojaatida.
“Turli jabhalarda erishilayotgan taraqqiyot tufayli mamlakat uchun yorug‘ kunlarni intiqlik bilan kutmoqdamiz”, — deya qo‘shimcha qildi u. Raisiy jamiyatda adolat, odamlar o‘rtasida yaqinlik, ishonchlilik, ezgulikni targ‘ib qilish, yomonlikdan qaytarish uchun sa’y-harakatlarni amalga oshirishga har bir inson mas’ul ekanini ta’kidladi.
Eron prezidenti Britaniyaning Tehrondagi yangi elchisi Saymon Sherklif bilan sentabr oyida bo‘lib o‘tgan uchrashuvida ham o‘z mamlakati hech qachon jahon kuchlarining bosimi va tahdidlariga berilmasligini aytgan.
“Eron xalqi mustaqillik va ozodlikka intilish ruhiga ega, boshqa davlatlar tomonidan tahqirlanganini his qilganda esa, u taslim bo‘lmaydi va tegishli munosabat bildiradi”, — degan Raisiy Tehrondagi uchrashuvda. U, shuningdek, Eron barcha davlatlar bilan o‘zaro hurmatga asoslangan munosabatlar va hamkorlikka intilishini ta’kidlagan.
“Eron Islom Respublikasi barcha davlatlar bilan hamkorlik qilishni istaydi, lekin bu hamkorlik o‘zaro hurmatga asoslangan bo‘lishi va xalqlar manfaatlarini hisobga olishi kerak, ustun kuchlar va hukmron tizim bu munosabatlarni nazorat qilmasligi kerak”, — degan Raisiy.
Eron prezidenti inson huquqlari boshqa davlatlarga qarshi siyosiy vositaga aylanganini ta’kidlab, Britaniyaning Tehrondagi yangi vakilini Eron haqidagi haqiqatlarni o‘z mamlakatiga yetkazishga chaqirgandi.
Izoh (0)