Yevropa Ittifoqi muhojirlarni Ittifoq hududiga tashishda yordam beradigan sayyohlik va transport kompaniyalarini qora ro‘yxatga kiritmoqchi. Bundan maqsad Belarus va Yevroittifoqga chegaradosh boshqa mamlakatlarning noqonuniy migratsiyadan jamiyatga tahdid sifatida foydalanishiga yo‘l qo‘ymaslik, deb yozadi Bloomberg Yevroittifoq ichki hujjatiga tayanib.
Yevropa Ittifoqining fikricha, hamjamiyat va Belarus chegaralaridagi muhojirlar bilan bog‘liq vaziyat ayrim transport va sayyohlik firmalari ishtirokisiz, ehtimol, yuz bermagan bo‘lardi.
Shu munosabat bilan Yevropadagi operatsiyalarga cheklovlar qo‘yish hamda noqonuniy muhojirlarni Yevropa Ittifoqiga o‘tkazishda ishtirok etgan deb hisoblanuvchi kompaniyalarning Yevropa Ittifoqidagi litsenziyalarini to‘xtatib turish taklif etilmoqda. Yevropa Komissiyasi ko‘riladigan choralar haqida 23-noyabr kuni e’lon qilishi kutilmoqda.
Yevropa Ittifoqining ichki hujjatlariga ko‘ra, cheklovchi chora-tadbirlar har bir holatning xususiyatlaridan kelib chiqadi va bir yildan keyin hisob-kitob qilinadi, shundan so‘ng ular uzaytirilishi mumkin, deyiladi Bloomberg xabarida.
8-noyabr kuni ertalab Belarus va Yevropa Ittifoqi davlatlari chegarasida vaziyat keskinlashdi. Belarus ommaviy axborot vositalari mamlakatning Polsha bilan chegarasi tomonga harakatlanayotgan muhojirlar karvoni aks etgan videolarni e’lon qildi. 11-noyabr kuni Buyuk Britaniya, AQSh va Yevropa Ittifoqi davlatlari Belarus hukumatini Polsha—Belarus chegarasidagi migratsiya inqirozini sun’iy ravishda yaratganlikda aybladi.
Yevropa Ittifoqi ma’muriyati muhojirlarni Polsha chegarasiga yetkazishni tashkil etishda ishtirok etgan barcha kompaniyalar va shaxslarga nisbatan sanksiyalar qo‘llash rejasini e’lon qilgach, bir qancha aviakompaniyalar Iroq va boshqa bir qator davlatlar fuqarolarini Belarusga tashishni chekladi. Jumladan, O‘zbekiston hududi orqali Iroq, Suriya, Yaman, Livan, Liviya va Afg‘oniston fuqarolarining Belarusga parvozi vaqtincha cheklandi.
Bundan tashqari Yevropa Ittifoqi Minsk aeroportiga qarshi sanksiyalar joriy etishi mumkinligi xabar qilingan. Minsk muhojirlar bilan bog‘liq inqirozga hech qanday aloqasi yo‘qligini va bu holatga aynan Yevropa siyosati sabab bo‘lganini ta’kidlamoqda.
Mavzuga doir:
- Iroq Belarusdagi qochqinlar lageridan o‘z fuqarolarini evakuatsiya qilishni boshladi
- Litva chegaradagi mojaro bo‘yicha Belarus bilan muzokaralar o‘tkazish imkoniyatini rad etdi
- Lukashenko Yevroittifoqdan 2 ming muhojir uchun gumanitar yo‘lak ochishni so‘radi. Yevroittifoq Lukashenko bilan muzokaralar o‘tkazish niyatida emas
Izoh (0)