Ilon Mask Tesla aksiyalaridagi yana 1,05 mlrd dollarlik ulushini sotdi

Tesla bosh direktori Ilon Mask kompaniyadagi ulushini qisqartirishda davom etmoqda, 23-noyabr kuni u yana 1,05 milliard dollarlik aksiyalarini sotdi, deb yozadi “Interfaks”.

AQSh Qimmatli qog‘ozlar va birja komissiyasiga (SEC) taqdim etilgan hujjatlarga ko‘ra, Mask  23-noyabr kuni Tesla’ning 934 ming dona aksiyasini sotgan.

Mask noyabr oyida Tesla aksiyalarini sotishni boshladi. 8-noyabr kuni u Twitter’dagi obunachilari orasida so‘rovnoma o‘tkazgan. Unda biznesmen obunachilardan Tesla aksiyalarining 10 foizini sotish kerakmi yoki yo‘qligini so‘ragan va har qanday holatda ovoz berish natijalariga rioya qilishga va’da bergan. U aksiyalarni sotish soliq to‘lashning yagona yo‘li, deb aytgan. Respondentlarning deyarli 58 foizi aksiyalarni sotish uchun ovoz bergan, unda 3,5 milliondan ortiq kishi ishtirok etgan.

Shundan buyon Mask 9,85 milliard dollarlik 9,2 millionta qimmatli qog‘ozlarni realizatsiya qildi.

So‘rovdan oldin Mask Tesla aksiyalarining 17 foizdan ko‘prog‘iga egalik qilardi. Uning ulushi qiymati 200 milliard dollardan oshiqroqqa, ulushdagi 10 foizlik paket (taxminan 17 millionta aksiya) esa qariyb 21 milliard dollarga baholangan edi. Shunday qilib, 10 foizlik paket realizatsiya qilinishi uchun Mask Tesla’ning yana 7,9 millionga yaqin aksiyasini sotishi kerak bo‘ladi.

Tesla aksiyalari 8-noyabrdan beri 9 foizga arzonlashdi. 23-noyabr kuni ularning qiymati 4,1 foizga tushdi.

The Wall Street Journal’ning hisob-kitoblariga ko‘ra, Mask Tesla aksiyalarining so‘nggi paytlarda amalga oshirilgan sotuvidan taxminan 3,5 milliard dollar soliq to‘lashi kerak bo‘ladi, agar uning Twitter’dagi so‘rovidan keyin aksiyalar narxi pasaymaganida, yanada ko‘proq soliq to‘lashi mumkin edi. Tesla aksiyalari qiymatining pasayishi Maskning 480 million dollarga yaqin mablag‘ini tejab qoldi, deb yozadi gazeta.