AQShning Afg‘oniston bo‘yicha maxsus vakili Tomas Uest kelasi hafta “Tolibon” yetakchilari bilan Islom respublikasidagi terrorizmga qarshi kurashni muhokama qilish uchun Dohaga keladi. Bu haqda 23-noyabr kuni jurnalistlar uchun o‘tkazilgan navbatdagi brifingda Davlat departamenti matbuot xizmati rahbari Ned Prays ma’lum qildi.
“AQShning Afg‘oniston bo‘yicha maxsus vakili Tomas Uestning kelasi hafta Dohaga qaytishini tasdiqlashim mumkin. U yerda ‘Tolibon’ yetakchilari bilan ikki haftalik uchrashuvlar chog‘ida Afg‘onistonga aloqador hayotiy muhim manfaatlarimiz, jumladan, terrorizmga qarshi kurash muhokama qilinadi”, — dedi Preys.
O‘tgan hafta Uest “Tolibon” terrorizmga qarshi kurash, inklyuziv hukumat qurish va ozchilikning huquqlarini hurmat qilish orqali qonuniylikka erishishi kerakligini aytgandi. Shu bilan birga, u AQSh afg‘on xalqiga insonparvarlik yordamini ko‘rsatishda davom etishini ta’kidlagan. Bu maqsadlar uchun Vashington joriy yilda 474 million dollar ajratgan.
Avvalroq “Tolibon” harakatiningg Qatardagi siyosiy idorasi vakili Muhammad Naim o‘zining Twitter’dagi sahifasida Afg‘onistonning toliblar tomonidan tuzilgan Tashqi Ishlar Vazirligi nomidan AQSh Kongressiga yuborilgan maktub matnini e’lon qilgan edi. Maktubda Afg‘onistonning sobiq hukumati zahiralarini blokdan chiqarishga chaqirilgan. Shuningdek, unda zaxiralarni muzlatish va “Tolibon”ga qarshi “iqtisodiy sanksiyalar” qo‘llash Afg‘onistondagi sog‘liqni saqlash va ta’lim tizimlari hamda fuqarolik xizmatlarining ishiga salbiy ta’sir ko‘rsatishi mumkinligi aytilgan.
Maktubda qayd etilishicha, AQShning sanksiya siyosati “nafaqat savdo va biznesga zarar yetkazgan”, balki koronavirus pandemiyasi, qurg‘oqchilik, urush va qashshoqlik ta’siriga uchragan mamlakatga juda zarur bo‘lgan insonparvarlik yordamini ko‘rsatish jarayoniga, ayniqsa yaqinlashayotgan qish sharoitida, salbiy ta’sir ko‘rsatgan. Toliblar fikriga ko‘ra, agar mavjud vaziyat davom etsa, mintaqa va dunyo davlatlari afg‘on migratsiya to‘lqini va buning natijasida yangi gumanitar muammolarga duch kelishi mumkin.
Oktabr boshida “Tolibon” harakati Afg‘onistonda ekstremistik jangarilar guruhlari, jumladan, IShID terrorchilik tashkilotining bo‘linmalariga qarshi kurashda AQSh bilan hamkorlik qilmoqchi emasligini bildirgandi.
Izoh (0)