Qirollik oilasi a’zolari The Princes and the Press (“Shahzodalar va matbuot”) filmining birinchi epizodi chiqqandan keyin BBC’ning kelajakdagi loyihalarini boykot qilish bilan tahdid qildi. Bu haqda Daily Mail xabar berdi.
Bukingem saroyi, shahzoda Uilyam va shahzoda Charlzning qo‘shma bayonotida aytilishicha, BBC filmi “shahzoda Garri va Uilyam o‘rtasidagi kelishmovchilik haqida oshirib yuborilgan va asossiz da’volarni haqiqiydek taqdim etadi”.
Xususan, suratga olish jarayonida ishtirok etganlardan biri jurnalist Omid Skobi “Meganning og‘zi” laqabini olgan. Filmda u qirollik oilasi a’zolarini Sasseks gersogi va gersoginyasiga qarshi birgalikda harakat qilishda ayblagan.
BBC’ning keyingi loyihalarini boykot qilish tahdidi qirollik oilasi vakillariga film namoyish etilishidan oldin uning mazmuni bilan tanishish va o‘z nuqtayi nazarini bildirish imkoniyati berilmagani bilan bog‘liq.
The Mirror nashrining yozishicha, korporatsiya qoidalariga ko‘ra, materiallar bilan faqat suratga olishning bevosita ishtirokchilari tanishishi mumkin, filmdagi nutq esa ommaviy axborot vositalari vakillari nomidan bo‘lgani uchun qoidalar buzilmagan.
22-noyabr, dushanba kuni chiqarilgan filmning birinchi epizodi shahzoda Uilyam va shahzoda Garrining 2012-yildan 2018-yilgacha (Garri Megan Markl bilan turmush qurguncha) bo‘lgan munosabatlarini ommaviy axborot vositalarida yoritishga qaratilgan. 2018—2021-yillardagi voqealarni qamrab oladigan ikkinchi epizod keyingi haftada e’lon qilinishi kerak.
Shazoda Garri va Megan Markl 2020-yil yanvar oyida qirollik unvonlaridan voz kechgan. Ular ishlash va biznes qilish uchun AQShga ko‘chib o‘tgan. Shahzoda Garri va Megan Marklning Bukingem saroyi bilan munosabatlari 2021-yil mart oyida — ularning amerikalik teleboshlovchi Opra Uinfriga bergan shov-shuvli intervyusidan so‘ng yomonlashdi, unda Sasseks gersoginyasi qirollik oilasining ayrim a’zolaridagi irqchilik kayfiyati haqida gapirgan.
Izoh (0)