“Tolibon” haqida ma’lumotlar tarqatishni taqiqlovchi Facebook ijtimoiy tarmog‘i Afg‘onistonda hokimiyat tepasiga toliblar kelganidan so‘ng, bir qator istisnolarni qo‘lladi, deb xabar beradi “Kommersant”.
The Intercept nashri ma’lumotlariga ko‘ra, sentabr oxirida kompaniya Afg‘oniston Ichki ishlar vazirligiga yangi yo‘l harakati qoidalariga bog‘liq ma’lumotlarni e’lon qilishga ruxsat bergan. Shuningdek, mamlakat Sog‘liqni saqlash vazirligiga koronavirus to‘g‘risidagi ma’lumotlarni jamlagan ikkita postning joylashtirilishiga ruxsat berilgan. Boshqa idoralarga bu kabi ruxsat berilmagan. Afg‘oniston IIV sahifasi oktabr oxirida o‘chirib tashlangan, SSV sahifasida esa 2-oktabrdan buyon yangi postlar yo‘q.
Facebook avgust oyida ma’lum bir vaqt davomida amaldorlarga toliblar Afg‘onistonning rasmiy hukumatini ifodalashi va shu bilan birga ijtimoiy tarmoqlarni blokash xavfi yo‘qligini ma’lum qilishiga ruxsat bergan. Bu kabi qisqa istisno avgust oxiridan 3-sentabrga qadar ham qo‘llanilgan: o‘shanda Facebook’ning barcha foydalanuvchilariga “Tolibon”ning barcha ommaviy bayonotlarini qayta e’lon qilishga ruxsat berilgan, bu “neytral muhokama, xabarlar yoki qoralashlar” uchun mo‘ljallanmagan.
Facebook vakili Salli Aldus “birlamchi davlat xizmatlarini ko‘rsatish borasidagi ba’zi kontentlarni”, xususan, Sog‘liqni saqlash vazirligiga COVID-19 haqida ikkita post joylashtirishga ruxsat berganini tasdiqlagan. Shu bilan birga, ijtimoiy tarmoq IIV, Moliya vazirligi va Jamoat ishlari vazirligi sahifalari baholanganidan so‘ng, ularni o‘chirib tashlagan. U Facebook o‘z siyosatini qanday ishlab chiqqanini ma’lum qilishdan va bu nima sababdan ommaviy e’lon qilinmaganini aytishdan bosh tortgan, biroq ijtimoiy tarmoq “ba’zi mamlakatlar hukumatlarini tan olish bo‘yicha qarorlar qabul qilmasligi, xalqaro hamjamiyatning bunday ta’riflarni tasdiqlash vakolatlarini esa hurmat qilishini” bildirgan.
Avvalroq “Tolibon” ayollar ishtirok etgan bir qator teledasturlarni efirga uzatishni taqiqlagani, Afg‘onistondagi inqiroz terrorizm va narkotrafikning ortishi bilan tobora tahdid solayotgani, JSST Afg‘onistonda 1 mln bola ochlikdan vafot etishi mumkinligini ma’lum qilgani to‘g‘risida xabar berilgandi.
Izoh (0)