Эрон президенти Иброҳим Раисийининг айтишича, мамлакат ўз куч-қудратини душманларига исботлаган, ҳозир Эрон фаровонлик ва тараққиёт сари интилишда давом этишни режалаштирмоқда. Бу ҳақда «Iran.ru» хабар берди.
«Ҳукумат ҳаётининг ҳар бир куни менда мамлакат тараққиётига тобора кўпроқ умид уйғотмоқда, ишончим комилки, турли масалалар бўйича жиддий қарорлар қабул қилинади ва бугун душманлар Эрон кучли позицияда эканини яхши билади», — деди Раисий Эрондаги «Басиж» (кўнгилли кучлар) аъзоларига мурожаатида.
«Турли жабҳаларда эришилаётган тараққиёт туфайли мамлакат учун ёруғ кунларни интиқлик билан кутмоқдамиз», — дея қўшимча қилди у. Раисий жамиятда адолат, одамлар ўртасида яқинлик, ишончлилик, эзгуликни тарғиб қилиш, ёмонликдан қайтариш учун саъй-ҳаракатларни амалга оширишга ҳар бир инсон масъул эканини таъкидлади.
Эрон президенти Британиянинг Теҳрондаги янги элчиси Саймон Шерклиф билан сентябрь ойида бўлиб ўтган учрашувида ҳам ўз мамлакати ҳеч қачон жаҳон кучларининг босими ва таҳдидларига берилмаслигини айтган.
«Эрон халқи мустақиллик ва озодликка интилиш руҳига эга, бошқа давлатлар томонидан таҳқирланганини ҳис қилганда эса, у таслим бўлмайди ва тегишли муносабат билдиради», — деган Раисий Теҳрондаги учрашувда. У, шунингдек, Эрон барча давлатлар билан ўзаро ҳурматга асосланган муносабатлар ва ҳамкорликка интилишини таъкидлаган.
«Эрон Ислом Республикаси барча давлатлар билан ҳамкорлик қилишни истайди, лекин бу ҳамкорлик ўзаро ҳурматга асосланган бўлиши ва халқлар манфаатларини ҳисобга олиши керак, устун кучлар ва ҳукмрон тизим бу муносабатларни назорат қилмаслиги керак», — деган Раисий.
Эрон президенти инсон ҳуқуқлари бошқа давлатларга қарши сиёсий воситага айланганини таъкидлаб, Британиянинг Теҳрондаги янги вакилини Эрон ҳақидаги ҳақиқатларни ўз мамлакатига етказишга чақирганди.
Изоҳ (0)