Istanbul va Anqara aholisi mamlakatdagi hukmron Adolat va taraqqiyot partiyasi hamda uning yetakchisi prezident Rajab Toyyib Erdo‘g‘onga qarshi norozilik namoyishi o‘tkazdi. Bunga liraning tarixiy minimumga qadar tushib ketishi sabab bo‘lgan: 1 AQSh dollarining kursi 13,4 liraga yetgan — bir sutka davomida kurs 15 foizga tushib ketgan, deb xabar beradi “Kommersant”. Norozilik namoyishchilari hukumatning iste’fosini talab qilgan.
Istanbuldagi namoyishchilar Shishli tumani ko‘chalari bo‘yicha yurgan. Politsiya Taqsim maydonini yopib qo‘ygan: 2013-yili u yerda hukumatga qarshi tartibsizliklarga aylanib ketgan daraxtlarning kesilishiga qarshi namoyishlar o‘tkazilgandi.
Mamlakat janubida joylashgan Diyorbakir shahridagi do‘konlarning egalari norozilik namoyishi ramzi sifatida soxta dollarni yoqib yuborgan. Turkiya aholisi, shuningdek, ijtimoiy tarmoqlar orqali o‘z noroziligini bildirmoqda: Reuters agentligi ma’lumotlariga ko‘ra, Turkiyada ommalashayotgan Twitter’da “biz cho‘kyapmiz” va “hukumat iste’foga chiqsin” kabi iboralar keng tarqalgan.
Ma’lumot uchun, lira kursi 2016-yil yozidan boshlab, mamlakatda harbiylar tomonidan davlat to‘ntarishiga urinish amalga oshirilganidan beri pastlamoqda. 2017-yil boshida Bloomberg agentligi lirani eng yomon valyuta tan olgan edi. Erdo‘g‘on bunda “qo‘li dollarga to‘la terrorchilar”ni ayblagan edi. 2018-yilda Erdo‘g‘on turklarni dollardagi jamg‘armalarini liraga o‘tkazishga chaqirgandi. 2021-yilning martida esa Erdo‘g‘on Turkiya Markaziy banki rahbarini ishdan bo‘shatgach, turk lirasi qadrsizlanib ketgan edi.
Izoh (0)