O‘zbekistonda ko‘p kvartirali uylar kamida 1 Gbit/s o‘tkazuvchanlik qobiliyati bilan internetga ulanadi

“O‘zbekiston Respublikasi telekommunikatsiya infratuzilmasini yanada rivojlantirish chora-tadbirlari to‘g‘risida”gi hukumat qarori qabul qilindi, deb xabar beradi Telegram’dagi “Huquqiy axborot” kanali.

Qarorga ko‘ra, 2022/2024-yillarda O‘zbekiston telekommunikatsiya infratuzilmasini rivojlantirishning maqsadli ko‘rsatkichlari hamda xalqaro va davlat ahamiyatiga molik avtomobil yo‘llarini mobil aloqa qamrovi bilan ta’minlash reja-jadvali tasdiqlangan.

Shunga ko‘ra, 2023 yilgacha, jumladan:

• xalqaro ma’lumotlar uzatish kanalining o‘tkazuvchanlik qobiliyati 3,5 marotaba oshiriladi;
• 150 ming kilometr optik tolali aloqa liniyalari qurilish hisobiga ma’lumotlar uzatish tarmog‘i kengaytiriladi;
• optik tolali aloqa liniyalari barcha aholi punktlariga yetkazilib, uy xo‘jaliklarining kamida 80 foizi internetga keng polosali simli ulanish imkoniyati bilan ta’minlanadi.

2021-yil yakunigacha barcha ichki ishlar organlari tayanch punktlari, mahalla fuqarolar yig‘inlari, jazoni ijro etish muassasalari, ichki ishlar organlari profilaktika inspektorlari xonalari, xalq ta’limi muassasalari, davlat arxivlari va tashkilotlari internetga keng polosali ulanadi.

Qarorga ko‘ra:

• mavjud chegara o‘tish nuqtalari orqali O‘zbekiston–Afg‘oniston–Pokiston, O‘zbekiston–Qirg‘iziston–Xitoy va O‘zbekiston–Turkmaniston–Ozarbayjon–Turkiya yo‘nalishlarida xalqaro magistral kanallar tashkil etiladi;
• Xitoyda yangi ulanish va o‘zaro internet trafigi almashinuvi nuqtalarini tashkil etish choralari ko‘riladi.

2022-yil 1-yanvardan internetga keng polosali ulanish tarmoqlarini loyihalash va qurishda quyidagilar nazarda tutiladi:

• ma’muriy binolar va ko‘p kvartirali uylarni kamida 1 Gbit/s o‘tkazuvchanlik qobiliyati bilan;
• ta’lim tashkilotlari, sog‘liqni saqlash muassasalari va boshqa davlat tashkilotlarini kamida 100 Mbit/s o‘tkazuvchanlik qobiliyati imkoniyati bilan ulash.

Avvalroq O‘zbekistonda operatorlarga internet tarif rejalari tezligini ko‘rsatishda “-gacha” qo‘shimchasidan foydalanish rasman taqiqlangani hamda O‘zbekiston tashqi internet kanalining tezligi soniyasiga 1800 gbitga yetkazilishi haqida xabar berilgandi.Eslatib o‘tamiz, 3-noyabr kuni ijtimoiy tarmoqlar bloklanishi ortidan prezident farmoni asosida Axborot texnologiyalari va kommunikatsiyalarini rivojlantirish vaziri Shuhrat Sodiqov lavozimidan ozod etilgandi. Uning o‘rniga shu kungacha xalq ta’limi vaziri sifatida ishlab kelgan Sherzod Shermatov tayinlangan edi.