Ўзбекистонда кўп квартирали уйлар камида 1 Гбит/с ўтказувчанлик қобилияти билан интернетга уланади

«Ўзбекистон Республикаси телекоммуникация инфратузилмасини янада ривожлантириш чора-тадбирлари тўғрисида»ги ҳукумат қарори қабул қилинди, деб хабар беради Telegram’даги «Ҳуқуқий ахборот» канали.

Қарорга кўра, 2022/2024 йилларда Ўзбекистон телекоммуникация инфратузилмасини ривожлантиришнинг мақсадли кўрсаткичлари ҳамда халқаро ва давлат аҳамиятига молик автомобиль йўлларини мобил алоқа қамрови билан таъминлаш режа-жадвали тасдиқланган.

Шунга кўра, 2023 йилгача, жумладан:

• халқаро маълумотлар узатиш каналининг ўтказувчанлик қобилияти 3,5 маротаба оширилади;
• 150 минг километр оптик толали алоқа линиялари қурилиш ҳисобига маълумотлар узатиш тармоғи кенгайтирилади;
• оптик толали алоқа линиялари барча аҳоли пунктларига етказилиб, уй хўжаликларининг камида 80 фоизи интернетга кенг полосали симли уланиш имконияти билан таъминланади.

2021 йил якунигача барча ички ишлар органлари таянч пунктлари, маҳалла фуқаролар йиғинлари, жазони ижро этиш муассасалари, ички ишлар органлари профилактика инспекторлари хоналари, халқ таълими муассасалари, давлат архивлари ва ташкилотлари интернетга кенг полосали уланади.

Қарорга кўра:

• мавжуд чегара ўтиш нуқталари орқали Ўзбекистон–Афғонистон–Покистон, Ўзбекистон–Қирғизистон–Хитой ва Ўзбекистон–Туркманистон–Озарбайжон–Туркия йўналишларида халқаро магистрал каналлар ташкил этилади;
• Хитойда янги уланиш ва ўзаро интернет трафиги алмашинуви нуқталарини ташкил этиш чоралари кўрилади.

2022 йил 1 январдан интернетга кенг полосали уланиш тармоқларини лойиҳалаш ва қуришда қуйидагилар назарда тутилади:

• маъмурий бинолар ва кўп квартирали уйларни камида 1 Гбит/с ўтказувчанлик қобилияти билан;
• таълим ташкилотлари, соғлиқни сақлаш муассасалари ва бошқа давлат ташкилотларини камида 100 Мбит/с ўтказувчанлик қобилияти имконияти билан улаш.

Аввалроқ Ўзбекистонда операторларга интернет тариф режалари тезлигини кўрсатишда «-гача» қўшимчасидан фойдаланиш расман тақиқлангани ҳамда Ўзбекистон ташқи интернет каналининг тезлиги сониясига 1800 гбитга етказилиши ҳақида хабар берилганди.Эслатиб ўтамиз, 3 ноябрь куни ижтимоий тармоқлар блокланиши ортидан президент фармони асосида Ахборот технологиялари ва коммуникацияларини ривожлантириш вазири Шуҳрат Содиқов лавозимидан озод этилганди. Унинг ўрнига шу кунгача халқ таълими вазири сифатида ишлаб келган Шерзод Шерматов тайинланган эди.