Zoir Mirzayev Qarshiga o‘rnatishni to‘xtatgan 1,350 mlrd so‘mlik bayroq shahar hokimi qarori bilan qayta bunyod etiladi

Qashqadaryo viloyatining sobiq hokimi Zoir Mirzayev o‘rnatishni to‘xtatgan Qarshi shahridagi 1 milliard 350 million so‘mlik bayroq Qarshi shahar hokimi qarori bilan qayta bunyod etilmoqda. Bu haqda “Daryo” muxbiri xabar berdi.

Qarshi shahri hokimi Normo‘min Xolboyevning 2021-yilning 15-noyabrdagi “Qarshi shahar mahalliy budjetining 2021-yilning III-chorak yakuni bo‘yicha daromadlar rejasining oshirib bajarilgan qismi hisobidagi mablag‘larni yo‘naltirish to‘g‘risida”gi qaroriga ko‘ra, mazkur bayroq qurilishi uchun 300 million so‘m mablag‘ ajratilgan.

Mazkur masala yuzasidan Qarshi shahar hokimining qurilish masalalari bo‘yicha o‘rinbosari G‘ayrat Sultonov bayroq o‘rnatilishi davom ettirilayotganini, shu bois 300 million so‘m ajratilganini bildirgan.

G‘ayrat Sultonov “Daryo” muxbirining “bayroq qurilishiga dastlab 1 milliard 300 million so‘m mablag‘ ajratilib, shunga ko‘ra loyiha qilingan bo‘lsa 300 million so‘m mablag‘ yetadimi?”, deya bergan savoliga yana qo‘shimcha mablag‘ ajratilishini, ammo avvalgi 1 milliard 350 million so‘mlik qiymat o‘zgarishi mumkinligini ma’lum qilgan.

“Loyiha qayta qilinadi va 1 milliard 350 million so‘m qisqartirtirilishi mumkin”, — deydi bu haqda gapirgan hokim o‘rinbosari.

G‘ayrat Sultonov “loyiha qilingach, loyihaga qarab mablag‘ ajratilmaydimi?”, deya berilgan savolga “Yo‘q, hozir bu mablag‘ birinchi loyiha bo‘yicha ajratilgan”, deya javob bergan.

Eslatib o‘tamiz, aprel oyida Qarshida 1 milliard 350 million so‘mlik bayroq qad rostlayotgani ma’lum bo‘lgach, Oliy Majlis deputati Doniyor G‘aniyev bunga e’tibor qaratib, 2020-yil Farg‘onada ham shunday tashabbus ilgari surilganini, biroq viloyat hokimi bayroq ustun qurilishi uchun 1 milliard so‘m mablag‘ kerakligini eshitgach, tashabbuskorlarni haydab yuborganini ma’lum qilgandi.

Qashqadaryolik bloger Umid Karimov esa viloyatning Dehqonobod tumanida qad rostlagan 40 metrlik bayroq 164 million 900 ming so‘mga tushganini, ko‘rinishi jihatidan shu bayroqdan farq qilmaydigan 62,5 metrlik bayroq esa 1 milliard 350 million so‘mga baholanayotganidan ajablanishini yozgandi. Shundan so‘ng viloyatning sobiq hokimi Zoir Mirzayev Qarshida xaroba ahvoldagi yotoqxona borligini aytib, bayroq uchun safrlanishi ko‘zda tutilgan 1 milliard 350 million so‘m mablag‘ yotoqxona ta’miri uchun safrlanishini ma’lum qilib, yotoqxona ta’mirini amalga oshirgandi.