Toshkentda qizning kiyimsiz holdagi videosini tarqatmaslik uchun undan 5 ming dollar talab qilgan shaxsga hukm o‘qildi

Toshkent shahrida qizning kiyimsiz holda tushgan videosini tarqatish bilan qo‘rqitib, 5 ming AQSh dollari talab qilgan shaxsga sud hukmi o‘qildi. Bu haqda “O‘zA” xabar berdi.

Ma’lum qilinishicha, J.A. (ism va familiyalar o‘zgartirilgan) ismli yigit tovlamachilik orqali pul topish maqsadida Sh.J. ismli qiz bilan ijtimoiy tarmoqlar orqali ancha vaqt gaplashib, keyinchalik Imo messenjeri yordamida u bilan gaplashgan. Shunday suhbatlarning birida u qizni kiyimsiz holda videotasvirga tushib, o‘ziga yuborishga ko‘ndirgan.

Yigit videotasvirni qo‘lga kiritganidan so‘ng qizdan pul undirmoqchi bo‘lgan. Telegram messenjerida profil ochib, qiz bilan bog‘langan. Keyin unga videotasvirlarning skrinshotini yuborib, agar 5 ming dollar bermasa, uni yaqinlariga yuborish bilan tahdid qilgan. Qiz esa tarqatmaslik evaziga 2500 dollar bera olishini aytgan. Shundan keyin yigit pulni yaqin atrofda joylashgan savdo majmuasida olishini ma’lum qilgan.

Pulni olishga o‘zi borsa, qiz uni tanib qolishidan qo‘rqib, J.A. qarindoshi U.A.ga “Bir tanishimning menda qarzi bor, imkoning bo‘lsa, o‘sha pulni olib kel. U pulni savdo majmuasiga olib keladi. 2500 dollarni olganingdan keyin manavi tilxat bilan xotira kartasini unga berasan”, — deb aldagan. U.A. uchrashuv belgilangan savdo majmuasining oldida Sh.J. bilan uchrashib, pulni olayotganida tezkor xodimlar tomonidan qo‘lga olingan.

Qayd etilishicha, sud majlisida J.A. o‘z aybiga qisman iqrorligini, dastlabki tergovda bergan ko‘rsatmasini tasdiqlamasligini bildirgan. Shuningdek, Sh.J. bilan o‘quvchilik paytidan beri gaplashib yurishini, keyinchalik Xitoyga o‘qishga ketgani sabab qiz bilan ko‘risha olmaganini, faqat ijtimoiy tarmoq orqali muloqot qilganini aytgan.

Yigit qiz bilan turmush qurmoqchi bo‘lgan, ammo qizning ota-onasi uni boshqa yigitga unashtirgan. Yigitga esa bu narsa qattiq alam qilgan va go‘yoki qiz uchun sarflagan pullarini shu yo‘l bilan undirib olmoqchi bo‘lgan. Garchi sudlanuvchi aybiga qisman iqror bo‘lsa-da, uning aybi yetarli dalillar bilan isbotlangan.

Mazkur holat yuzasidan J.A.ga Jinoyat kodeksining 165-moddasi 1-qismi bilan (tovlamachilik) 4 yil muddatga sutkaning kechki soat 22:00 dan ertasi kuni soat 06:00 ga qadar ozodlikni cheklash jazosi tayinlangan.