Namanganda bir-biriga tutash 4 ta uyda yong‘in sodir bo‘ldi

20-noyabr kuni soat 07:10 da Namangan shahar “Istiqbol” MFYda bir-biriga tutash qurilgan uylarda yong‘in sodir bo‘ldi, deb xabar beradi FVV matbuot xizmati.

Ma’lum qilinishicha, voqea joyiga shahar FVBning 6 ta yong‘in-qutqaruv ekipaji soat 07:16 da yetib borgan, yong‘in soat 07:21 da qurshab olinib, soat 07:58 da to‘liq o‘chirilgan.

Yong‘indan 4 ta uyning taxminan 300 kvadrat metr maydonda tom, shift qismi va uy jihozlari yonib zararlangan.

Yong‘in oqibatida jabrlangan va halok bo‘lganlar yo‘q. Hozirda yong‘in sababi hamda keltirilgan moddiy zarar miqdori aniqlanmoqda.

Avvalroq Toshkent viloyatida bir-biriga qo‘shni ikki uyda, Samarqanddagi ikki qavatli savdo markazida, Nukusda bir-biriga tutash to‘rtta xonadonda, Toshkentdagi “Milliy taomlar” oshxonasiga mo‘ljallangan binoda yong‘in chiqqani to‘g‘risida xabarlar berilgandi.